Degi barnabókarinnar fagnað

Smásaga eftir Gunnar Helgason frumflutt fyrir alla grunnskólanema landsins í stærstu sögustund ársins.

Í fyrramálið verður ný, íslensk smásaga eftir Gunnar Helgason frumflutt í öllum grunnskólum landsins kl. 9.10. Sagan verður samtímis flutt á Rás 1 svo að öll þjóðin getur lagt við hlustir.

Gunnar skrifaði söguna Lakkrís – eða Glæpur og refsing fyrir börn á aldrinum 6-16 ára í tilefni dags barnabókarinnar að beiðni IBBY á Íslandi, en þetta er í fimmta sinn sem félagið fagnar deginum með þessum hætti.

Sagan verður lesin fyrir grunnskólabörn á öllum aldri í leikfimisölum og smíðastofum, á sal og í sundlaugum, í frímínútum og í dönskutímum, allt eftir því hvernig hver skóli kýs að fella upplesturinn að stundaskrám nemendanna.

Við hvetjum fjölmiðla til þess að hafa samband við nærliggjandi grunnskóla og fá að fylgjast með sögustundinni, sem er einstök í sinni röð.

Bókmenntaverðlaunin Sögusteinn

Í tilefni dags barnabókarinnar mun IBBY á Íslandi afhenda bókmenntaverðlaun félagsins þennan sama dag, 9. apríl, kl. 17:00 í Borgarbókasafni. Þar fær valinkunnur listamaður verðlaunagripinn Sögustein auk 500.000 króna peningaverðlauna.

Um sögustein segir svo í þjóðsögum Jóns Árnasonar: „Sögusteinn finnst í maríuerluhreiðri í maí. Skal maður bera hann á sér í blóðugum hálsklút og láta hann í hægra eyra þegar maður vill verða einhvers vísari af honum; segir hann þá allt sem maður vill vita.“