Cristal verkefnið á góðu skriði

Á heimasíðu ÞÞ segir að undanfarna mánuði hafi vinna við verkefnið verið í fullum gangi og á næstu mánuðum verða keyrð prufuverkefni í nokkrum markhópum í skólum í Norðurþingi.

 

Verkefnið snýst um að koma sjálfbærni, frumkvöðlamennt og tæknimennt inní kennslu á leik-grunn- og framhaldsskólastigi. Norðurþing er prufusvæði í verkefninu en afurð þess verður öllum opin á miðlægum gagnagrunni á netinu. Öllum skólum í Norðurþingi var boðin þátttaka í tæknihópi kennara og eru nú 6 kennarar þátttakendur í verkefninu.

 

Í ágúst fór hópurinn á viku Fab-lab námskeið á Sauðárkróki, þar sem verið var að kynna grunnatriði í laserskurðartækni, þrívíddarprentun, örgjörvatölvun og fleiri forritum sem hægt er að nota til kennslu. Við prufukeyrslu verður meðal annars horft til þess að nýta Micro-bit örgjörvatölvur sem allir skólar fengu gefins fyrir nemendur í 6-7 bekk.

 

Þá fer hópurinn til Sikileyjar í mars, þar sem kennslulota í sjálfbærni fer fram en einn af þátttakendum í verkefninu er sjálfbær ólívubúgarður á Sikiley sem hefur hlotið viðurkenningar fyrir frumleika og metnað við sjálfbærni og umhverfisvitund. Háskólinn á Akureyri er þátttakandi í verkefninu og eru nemendur sem læra til kennara nú að undirbúa verkefni um sjálfbærni, sem hægt er að kenna á leik- og grunnskólastigi.

 

Þá er fyrirtækið Lindberg&Lindberg í Svíþjóð einnig aðili í verkefninu og koma þeir að því að smíða miðlægan gangagrunn þar sem hægt er að nálgast efni, niðurstöður verkefnis og kennsluefni. Í ágúst á þessu ári verður vinnudagur þar sem öllum skólum á starfssvæði Þekkingarnetsins gefst kostur á að kynna sér framgang verkefnisins, prufuverkefni kynnt og ferlið í kring um innleiðingu þessara verkþátta inní kennslu.

 

Myndir frá vinnu við verkefnið sem lýkur í ágúst 2018 má skoða hér.