Betri þjónusta með nýjum vef VÍS

VÍS hefur tekið nýjan og gjörbreyttan vef í notkun, vis.is. Vefurinn er hannaður frá grunni, í samvinnu við hugbúnaðarhúsið Kolibri, með virkni og upplifun viðskiptavina að leiðarljósi.

Ætlunin er að vis.is verði þjónustuskrifstofa á netinu sniðin að þörfum hvers og eins. Meðal annars er hægt að tilkynna tjón og fylla út rafrænar tjónstilkynningar.

„Við erum stolt af þessu framfaraspori sem tekið er með nýjum vef félagsins. Þetta er í samræmi við stefnu VÍS um rafræna þjónustu og fyrsta skrefið að því markmiði að verða í fararbroddi á því sviði,“ segir Sigrún Ragna Ólafsdóttir forstjóri VÍS í fréttatilkynningu.

„Ég er sannfærð um að nýi vefurinn mun auka ánægju þess vaxandi hóps sem nýtir sér rafrænar lausnir. Áfram verður unnið að framþróun rafrænnar þjónustu með óskir og þarfir viðskiptavina að leiðarljósi.“

Markmiðið er að allt efni sé sem aðgengilegast á vis.is og notkun þess örugg. VÍS var til að mynda fyrsta tryggingafélagið sem bauð viðskiptavinum upp á rafræna auðkenningu með síma.