Ályktanir frá aðalfundi kjördæmisráðs VG

Aðalfundur kjördæmisráðs Vinstri grænna í Norðausturkjördæmi var haldinn á Húsavík um helgina.

Þingmenn Vinstri grænna í kjördæminu ávörpuðu fundargesti.

Í fréttatilkynningu segir að Bjarkey Gunnarsdóttir, þingkona, hafi gagnrýnt fjárlagafrumvarp ríkisstjórnarinnar og ráðherra fyrir stórkallalegan talanda sem felst í hefðbundinni hægristefnu. Bjarkey nefndi líka að engar framkvæmdir væru fyrirhugaðar í samgöngumálum og svo virðist vera að innanríkisráðherra hafi hreinlega gleymt þeim.

Fyrir fundinum lágu þrjár ályktanir sem allar voru samþykktar en þær voru eftirfarndi:

Ályktun um samgöngumál og fjarskipti.

Innanríkisráðherra hefur staðfest vilja ríkisstjórnar um enn frekari niðurskurð á nýframkvæmdum í samgönguáætlun og fjárfesting ríkisins í heild hefur dregist verulega saman.  Kjördæmisráð Vinstrihreyfingarinnar græns framboðs í Norðausturkjördæmi lýsir miklum vonbrigðum með framgöngu ríkisstjórnar Framsóknarflokks og Sjálfstæðisflokks í samgöngumálum. Þegar tvö og hálft ár eru liðin frá síðustu Alþingiskosningum er staðan sú að engin samgönguáætlun hefur verið afgreidd í tíð þessarar ríkisstjórnar og málaflokkurinn virðist sæta algerum afgangi. Þrátt fyrir batnandi afkomu ríkissjóðs verður ekki bætt við fé hvorki til viðhalds vegakerfisins né nýbygginga. Nánast óbreyttum fjármunum  ætlað að renna til hafnargerðar og flugvellir út um landið mega heita aflagðir. Aðeins 300 milljónir eiga samkvæmt fjárlagafrumvarpinu að renna í fjarskiptasjóð þrátt fyrir hástemmdar yfirlýsingar stjórnarliða um ljósleiðaravæðingu landsins. Áætlað er að það verkefni kosti 6.500 milljónir svo ætla mætti að ríkisstjórnin sjái fyrir sér að vinna það á 20 árum.

Kjördæmisráð Vinstrihreyfingarinnar – græns framboðs í Norðausturkjördæmi krefst þess fyrir hönd íbúa landsbyggðanna og landsmanna allra að fjárfestingar ríkisins í innviðum samgangna og fjarskipta verði auknar samhliða batnandi afkomu og nái langtímameðaltali af landsframleiðslu innan tveggja ára.

Ályktun um málefni flóttamanna og þróunarsamvinnu.

Fundur kjördæmisráð Vinstrihreyfingarinnar – græns framboðs í Norðausturkjördæmi haldin á Húsavík 19. september 2015 hvetur sveitarfélög og landsmenn alla til að bjóða fram krafta sína þannig að Íslendingar geti lagt sitt af mörkum í þágu bágstaddra flóttamanna og hælisleitenda svo sómi sé að. Landsmenn verða augljóslega að beita ríkisstjórnina þrýstingi til að koma henni í skilning um að almenningur vill gera miklu mun betur í þessum efnum en ríkisstjórnin sjálf áformaði. Þá er það neðan við allar hellur að á tímum batnandi þjóðarhags eigi framlög til þróunarsamvinnu, samkvæmt fjárlagafrumvarpinu, að standa í stað og ríkisstjórnin hyggist ekki einu sinni standa við sín eigin metnaðarlausu áform í þeim efnum.

Ályktun um menntamál

Kjördæmisráð Vinstrihreyfingarinnar – græns framboðs í Norðausturkjördæmi fordæmir framgöngu menntamálaráðherra í skólamálum. Sameining framhaldsskóla, hæfnispróf, þjóðarátak í lestri og málefni háskólastigsins gefa öll tilefni til efasemda um heilindi ráðherra hvað varðar menntastefnu í þágu landsins alls. 

Kjördæmisráð hafnar tillögum um sameiningar framhaldsskóla í kjördæminu og vill leggja áherslu á að standa vörð um sérstöðu þeirra og fjölbreytni. Hlutdeild þeirra í byggðafestu ætti að efla með enn frekara námsframboði sem byggir á þátttöku fólks í héraði á öllum aldri. Framhaldsskólar verða að tilheyra samhangandi samgöngusvæðum, þar sem greiðfært er og auðsótt til skólans fyrir heimafólk. Kjördæmisráð hvetur til samvinnu milli skóla á svæðinu og bendir á að tækifærin liggja í eflingu fjarkennslu þar sem einn framhaldsskóli gæti boðið nám annarra skóla sem leggst þá til með því sem í boði er á hverjum stað. Í miðri efnahagslægð var mögulegt að stofna framhaldsskóla og byggja upp framhaldsnámssetur í fjölda byggðalaga. Ekki ætti því fjárskortur að vera málsvörn í samruna áformum. Engu að síður ber ráðherra hagræðingu fyrir sig og vill ganga lengra og hefur nú lagt stein í götu nemenda eldri en 25 ára til náms í framhaldsskólum. Þar með hefur hann rekið stóra hópa úr framhaldsskólum eða á vit styttra og dýrara framhaldskólanáms í háskólabrúm eða endurmenntunarstofnunum. 

Kjördæmisráð mótmælir jafnframt hæfnisprófum sem fela í sér mælingar, greiningar og eftirlit sem virðast þannig í fyrirrúmi í nálgun ráðherrans á skólastarf. Slíkt er aðeins til þess fallið að gera menntun einsleitari og leyfir ekki skólunum að leika sitt hlutverk sem þátttakandi og mótandi afl í samfélagi hvers staðar. Kjördæmisráð krefst þess ráðherrann láti af sinni miðstýringar- og eftirlitsáráttu og leyfi fjölbreytni að blómstra í íslensku skólastarfi.

Í stjórn voru kjörin: Björn Halldórsson, formaður, Vopnafirði, Ingibjörg Þórðardóttir, Neskaupsstað, Edward H. Huijbens, Akureyri, Hrafnkell Lárusson, Egilsstöðum, Inga Eiríksdóttir, Ólafsfirði, Trausti Aðalsteinsson, Húsavík, Guðrún Þórsdóttir, Akureyri.

Til vara: Vilberg Helgason, Akureyri og Gunnar Ólafsson, Austfirðir.