Alþjóðlegur ADHD vitundarmánuður

05. okt

Alþjóðlegur ADHD vitundarmánuður
Fréttatilkynning - - Lestrar 352

Fjöldi viðburða er á dagskrá á vegum ADHD samtakanna nú í október, alþjóðlegum ADHD vitundarmánuði.

BÓKAÚTGÁFA: Leikskólar og ADHD, 25 ráð og verkfæri

ADHD samtökin hafa ráðist í útgáfu bókarinnar „Leikskólar og ADHD, 25 ráð og verkfæri“.

Lengi hefur verið spurn eftir efni um börn með ADHD og leikskólann, sem hægt er að styðjast

við í vinnu með börnum með ADHD. Í þeim tilgangi að mæta þörfinni var ráðist í gerð bókarinnar.

"Halli Pollapönkari" Haraldur F. Gíslason, formaður Félags leikskólakennara, tók við fyrsta eintaki bókarinnar í morgun.

Dönsku ADHD samtökin gáfu bókina út í fyrra en hún er hluti af KIK-verkefninu (Kærlighed I Kaos) foreldrafærninámskeiði dönsku ADHD samtakanna. Bókin hefur nú verið þýdd á íslensku og staðfærð. Þýðingu önnuðust Elín H. Hinriksdóttir og Drífa B. Guðmundsdóttir.

Sorpa og Öryrkjabandalag Íslands styrktu útgáfu bókarinnar.

Í bókinni er að finna 25 ráð og verkfæri sem geta hjálpað starfsfólki leikskóla í daglegu starfi og vonandi orðið því innblástur, ásamt því að veita nýjar hugmyndir. Aðferðirnar sem lýst er, henta ekki eingöngu börnum með ADHD heldur geta þær gagnast öllum börnum.

Bókin verður gefin öllum leikskólum landsins. Þá verður bókin fáanleg á skrifstofu ADHD samtakanna, Háaleitisbraut 13, Reykjavík og á vef samtakanna, www.adhd.is

Höfundar bókarinnar, Drífa B. Guðmundsdóttir og Elín H. Hinriksdóttir.

ENDURSKINSMERKI: Námsmenn á Múlaborg taka við fyrstu merkjunum

Formleg afhendingu endurskinsmerkis ADHD samtakanna árið 2015 fór fram við sama tækifæri en þetta er sjöunda árið sem ADHD samtökin selja endurskinsmerki í þágu starfseminnar.

Sem fyrr á Hugleikur Dagssson teikninguna á merkinu.

Fyrstu merkin voru afhent nemendum og starfsfólki á leikskólanum Múlaborg í morgun.

Endurskinsmerkin verða svo seld á afgreiðslustöðum N1, á skrifstofu ADHD samtakanna, Háaleitisbraut 13, Reykjavík og á vefnum www.adhd.is Allur söluágóði rennur til ADHD samtakanna.

MÁLÞING: Leikskólinn og ADHD - Að Skilja, Styðja og Styrkja

ADHD samtökin efna til málþings föstudaginn 30. október í Gamla Bíói.

Málþingið hefst klukan 12:00 og stendur til klukkan 16:30.

Yfirskrift þess er; Leikskólinn og ADHD - Að Skilja, Styðja og Styrkja

Skráning er hafin á vef ADHD samtakanna en nánari dagskrá verður auglýst síðar.

Almennt verð er kr. 3.000,- en félagsmenn ADHD samtakanna greiða kr. 2.000,-

Í skráningargjaldi eru innifaldar léttar veitingar og nýútkomin bók um leikskólann og ADHD.

Sérstakur afsláttur verður veittur vegna skráningar hópa, t.a.m. frá leikskólum.

ADHD samtökin eru frjáls félagasamtök sem eru að mestu leyti rekin á frjálsum framlögum og styrkjum.

Félagsmenn eru rúmlega 2.300 talsins.

ADHD er alþjóðleg skammstöfun sem stendur fyrir Attention Deficit Hyperactivity Disorder eða athyglisbrestur og ofvirkni.

Samkvæmt erlendum faraldsfræðilegum rannsóknum má gera ráð fyrir að um 6.000 börn og 10.000 fullorðnir séu með ADHD á Íslandi.

Markmið ADHD samtakanna er að börn og fullorðnir með athyglisbrest, ofvirkni og skyldar raskanir mæti skilningi alls staðar í samfélaginu og fái þjónustu sem stuðlar að félagslegri aðlögun þeirra, möguleikum í námi og starfi og almennt bættum lífsgæðum.

Niðurstöður rannsókna hérlendis og erlendis sýna að um 7-10% barna glíma við ADHD.

Orsakir athyglisbrests eru líffræðilegar og stafa af truflun boðefna í miðtaugakerfi og heila.

Samkvæmt rannsóknum er talið að stærstu áhrifaþættir í þróun ADHD séu:

- Arfgengi (60-80% er talið erfðatengt)

- Áhrif á meðgöngu (sýkingar, neysla áfengsi og/eða vímuefna)

- Fyrirburar

- Heilaskaðará fyrsta æviári

- Sjúkdómar eða slys

- Aðrar þroskarasakanir

Börn og unglingar með ADHD eiga erfitt uppdráttar bæði námslega og félagslega. Um 50-70% þeirra eru áfram með einkenni athyglisbrests og ofvirkni sem fullorðin og um 30% þeirra þróa með sér alvarleg sálfélagsleg vandamál og ánetjast vímuefnum.