Ágreiningur um farþegagjöld

02. nóv

Ágreiningur um farþegagjöld
Almennt - - Lestrar 339

Húsavíkurhöfn.

Á fundi Hafnanefndar Norðuþings í vikunni kom fram að Norðursigling hefur ekki greitt sveitarfélaginu farþegagjöld frá ársbyrjun 2015.

Ágreiningur hefur verið uppi milli Norðursiglingar og Norðurþings um greiðslu gjaldanna.

Þá hefur Gentle Giants ekki greitt farþegagjöld fyrir árið 2015 og einn reikning frá árinu 2010. Önnur fyrirtæki sem stunda farþegaflutninga við höfnina hafa greitt farþegagjöld samviskusamlega frá upphafi rekstrar.

Fram kom á fundinum að uppbygging í og við Húsavíkurhöfn hefur verið umtalsverð síðastliðin ár; dýpkun, flotbryggjum fjölgað og þær stækkaðar og sjóvarnir styrktar. Uppbyggingu er hvergi nærri lokið enda mikill vöxtur í ferðaþjónustu. Ferðaþjónusta er ein meginstoð atvinnulífs á svæðinu og brýnt að hlúa vel að vextinum.

Til að standa undir þessari uppbyggingu þarf Hafnasjóður tekjur fyrir veitta þjónustu. Greiði fyrirtæki ekki gjöld sem þeim er skylt að greiða verður eðli málsins samkvæmt leitað til dómstóla vegna ógreiddra reikninga.

Ljóst er að ágreiningur er á milli Hafnasjóðs og Norðursiglingar um stofn gjaldtökunnar og upphæð. Áður hefur Hafnasjóður rökstutt veitta þjónustu og uppbyggingu Húsavíkurhafnar. Gentle Giants hefur einnig ekki staðið í skilum á farþegagjöldum.

Hafnastjóra og Rekstrarstjóra hafna er falið að vinna málið áfram með lögfræðingum og sækja málið.

Í frétt um málið á Vísi.is í dag segir Pétur J. Eiríksson stjórnaformaður Norðursiglingar: „Þessi gjöld hafa verið nýtt í almennar hafnarbætur en okkar sjónarmið hefur verið að þau megi einungis nota til aðstöðu fyrir farþega. Við erum í vináttu að ræða þessi mál og leita lögfræðiálita en við teljum að skýrar reglur séu fyrir því í hvað eigi að nota þessi gjöld. Við teljum að Norðurþing hafi ekki getað sýnt fram á í hvað peningarnir verða notaðir og þá hvort upphæðin sem verið er að leggja á sé rétt“.

Í fréttinni segir að samkvæmt upplýsingum frá hafnarstjórninni var innheimta farþegagjalda ekki í föstum skorðum hjá höfnum Norðurþings árið 2015 og nokkru fyrr. Það geti skýrt af hverju Gentle Giants hafi ekki heldur greitt það ár en Stefán Guðmundsson eigandi GG vildi ekki ræða málið við Vísi.is og sagði þetta misskilning.

« Til baka