Afmælishátíð - Læknamiðstöðin á Húsavík 50 ára

Ungu læknarnir eru enn að eftir 50 ár.

Á dögunum var blásið til afmælishátíðar á HSN á Húsavík þar sem fagnað var 50 ára afmæli Læknamiðstöðvarinnar á Húsavík sem og 80 ára afmæli Gamla sjúkrahússins.

Jón Helgi Björnsson, forstjóri HSN, ávarpaði gesti og kom m.a inn á sögu sjúkrahússins.

"Þann 11.desember 1933 var haldinn undirbúningsfundur að byggingu sjúkrahússins eftir reyndar hvatningu félags sjálfstæðismanna. Þar voru fulltrúar kvenfélagsins, Verkakvennafélags Húsavíkur; Félag sjálfstæðismanna, félag iðnaðarmanna, fiskideildin á Húsavík , fulltrúar karlakórsins og Völsungs. Þessir aðilar hófust handa við að hvetja til byggingar júkrahúss með því að fá fjárframlag frá sveitarfélögum og ríkinu. En ekki síður með því að standa fyrir fjáröflun og fá styrki frá einstaklingum og félögum.

Haldin var hlutavelta, gefin út ljóðabók með 50 ljóðum eftir Þingeyska höfunda þessa sem ég held hér á. Margir gáfu vinnu, höfðu kannski ekki annað að gefa, happdrætti var haldið þar sem bílferð til Reykjavíkur fram og til baka. var í verðlaun, dúnn í sæng, Ljóð Davíðs Stefánssonar, kreppubréf og fleira. Samtals söfunuði einstaklingar fyrir hátt í fjórðung byggingarkostnaðarins. Nýja sjúkrahúsið sem við nú köllum Gamla sjúkrahúsið var tekið í notkun 17. nóvember 1936 eða fyrir 80 árum". Sagði Jón Helgi.

Jón Helgi Björnsson forstjóri Heilbrigðisstofnunar Norðurlands flutti ávarp.

"Við erum hér líka að fagna 50 ára afmæli Læknamiðstöðvarinnar á Húsavík. Á árinu 1966 réðust hingað til starfa tveir ungir læknar þeir Ingimar Hjálmarsson og Gísli G. Auðunsson til starfa. Munu það hafa verið Ingvar Þórarinsson bóksali og Karl Kristjánsson sem höfðu forgöngu um að bjóða þeim til starfa.

Á þessum tíma voru erfiðleikar við að manna einmennings héröð og samgöngur höfðu líka breyst þannig að mögulegt var að þjóna stærri svæðum. En þeir Gísli og Ingimar tóku upp á þeirri nýbreytni að að setja á fót Læknamiðstöð hér á Húsavík og þar unnu þeir brautryðjandastarf þar sem horfið var frá því að læknar ynnu einir í einmenningsstöðvum.  

Við tæki kerfi þar sem læknar og annað starfsfólk ynnu saman í teymum. Ritari sæi um ritun, hjúkrunarfræðingar um eftirlit í skólum o.sfrv.Er þetta í raun fyrsta heilsugæslustöðin sem sett var á fót hérlendis með þessu sniði. Í dag eru nær öll heilsugæsluþjónusta skipulögð á þennan hátt og reyndar göngum við hér á Húsavík hvað lengst í þessa átt.

Gísli og Ingimar fóru svo í framhaldsnám þar sem, Gísli menntaði sig í hjartalækningum og svæfingum en Ingimar menntaði sig í röntgenlækningum. Allt var þetta menntum sem nýttist svæðinu einstaklega vel og augljóslega valið með tilliti til þarfa hér og fyrir samfélagið hér í Þingeyjarsýslu var það tvöfaldur hvalreki að fá þá Ingimar og Gísla til starfa. Og nýjungarnar sem þeir innleiddu hafa ruddu brautina fyrir aðra og verið þeim fyrirmynd.

Læknamiðstöðinn er enn í dag fyrirmynd að því sem menn telja hvað best í dag. Eftir þeirra starf sem er reyndar ekkert lokið stendur eftir eining hér á Húsavík sem er sterk faglega og er góður staður til að vinna á". Sagði Jón Helgi og afhenti síðan Gísla og Ingimar blómvendi í tilefni þessara tímamóta en þeir starfa enn hjá stofnunni og hafa því náð 50 ára starfsaldri.

Ingimar Hjálmarsson, Sigríður Birna Ólafsdóttir, Katrín Eymundsdóttir og Gísli G. Auðunsson með blómvendi sem formaður Félags íslenskra heimilislækna afhenti þeim.

Heilsutríóið tók nokkur lög í afmælisfagnaðinum sem fram fór í biðstofu heilsugæslunnar.

Gestir voru margir eins og sjá má á næstu myndum en með því að smella á þær er hægt að fletta þeim og skoða í stærri upplausn.

Gestir var boðið að kynna sér nýja aðstöðu göngudeildar og endurbætur á gamla sjúkrahúsinu og hér sýnir Ásgeir Böðvarsson áhugasömum aðstöðuna.

Völundur Hermóðsson var einn þeirra sem kynnti sér aðstöðuna hjá Ingimar lækni.