Afhentu formlega ný maga- og ristilspeglunartæki á aðalfundi

18. maí

Afhentu formlega ný maga- og ristilspeglunartæki á aðalfundi
Almennt - - Lestrar 361

Áslaug Halldórsdóttir og Daníel Borgþórsson.

Á aðalfundi Styrktarfélags HSN í Þingeyjarsýslum á dögunum voru ný maga- og ristilspeglunartæki formlega afhent HSN á Húsavík.

Það gerir stofnuninni kleift að taka þátt í skimunarátaki, sem fyrirhugað er á landsvísu, fyrir maga- og ristilkrabbameini hér í Þingeyjarsýslum.

Speglunartækin kostuðu um níu milljónir króna,að frátöldum virðisaukaskatti, og nýtur félagið stuðnings félagasamtaka, einstaklinga og fyrirtækja við verkefni sín fyrir heilbrigðisstofnunina.

Tilgangur félagsins er að styðja við starfsemi starfstöðva HSN í Þingeyjarsýslum með fjárframlögum til kaupa á ýmis konar lækningatækjum og öðrum nauðsynlegum búnaði sem bætir aðbúnað sjúklinga og aðstandenda þeirra.

Fjáröflun félagsins er með innheimtu árgjalda félagsmanna, sölu minningarkorta og frjálsum fjárframlögum frá einstaklingum og fyrirtækjum.

Einnig eru félagasamtök á svæðinu öflug við að láta sitt góðgerðarfé renna til Styrktarfélagsins þegar söfnunarátök eru í gangi fyrir sérstökum tækjum eða búnaði fyrir starfsstöðvar stofnunarinnar á svæðinu.

"Við fengum gríðarlega góðan stuðning frá félagasamtökum hér á svæðinu við söfnun fyrir þessum nýju tækjum. Lionsklúbbur Húsavíkur hafa undanfarin 10 ár staðið myndarlega að því að afla fjár fyrir skimunarátaki fyrir ristilkrabbameini í samvinnu við HSN hér á svæðinu.

Nú þegar þessu verkefni þeirra er lokið ákváðu þeir að láta það fjármagn sem eftir stóð inn í söfnunarátakið, alls 4 milljónir króna. Kvenfélögin í Mývatnssveit, á Tjörnesi, á Húsavík, í Aðaldal og Bárðardal gáfu samtals um 2,3 milljónir og auk þess sem einn einstaklingur gaf 100 þúsund krónur.

Fyrir utan söfnunina fyrir speglunartækjunum þá gáfu önnur kvenfélög, félagasamtök og einstaklingar einnig myndarlega inn í safnanir fyrir öðrum mikilvægum tækjum og búnaði s.s. hjúkrunarrúm, velti sjúkrarúm, baðstóla, EKG tæki og sérhæft tæki til ungbarnaeftirlits.

Þetta sýnir auðvitað mikilvægi þess að eiga þessi öflugu félagasamtök á svæðinu og hvernig þau láta gott af sér leiða til margskonar verkefna í sínu héraði" segir Daníel Borgþórsson formaður Styrktarfélags HSN en starfsvæði félagsins nær frá Ljósavatnsskarði í vestri, austur fyrir Langanes og Mývatnssveit í suðri.

Að sögn Daníels er það áhyggjuefni að félögum í Styrktarfélaginu fer fækkandi og meðalaldur félagsmanna er hár.

"Við þurfum því að ná betur athygli hjá yngra fólkinu og vekja það til umhugsunar um mikilvægi þess að hægt sé að veita góða heilbrigðisþjónustu á svæðinu.

Þó svo að við auðvitað óskum engum að þurfa að nýta þjónustuna til skemmri eða lengri tíma þá eru alltaf líkur á að þau sjálf, börnin þeirra, foreldrar eða afar og ömmur þurfi að dvelja á sjúkradeildinni eða öldrunardeildinni á Húsavík, svo að þá er gott að aðbúnaður þeirra sé eins og best verður á kosið.

Hægt er að gerast félagi fyrir hóflegt árgjald og svo tökum við að sjálfsögðu líka við frjálsum framlögum" segir Daníel en hafa má samband við afgreiðslur heilsugæslustöðva á svæðinu til að fá upplýsingar um hvernig hægt er að skrá sig í félagið.

Þess má einnig geta að stefnt er á að klára á næstunni skráningu félagsins sem almannaheillafélag hjá skattinum en þá munu styrktaraðilar og félagsmenn njóta skattafrádráttar fyrir sín framlög til félagsins.