Göngin malbikuð með norsku steinefniAlmennt - - Lestrar 683
Norska efnisflutningaskipið Nordfjörd hefur komið tvívegis til Húsavíkur að undanförnu.
Skipið hefur verið með farma sem innihalda steinefni sem notað verður við malbikun iðnaðar-vegarins í Húsavíkurhöfða-göngum.
Skipið kom í fyrra skiptið fyrir rúmri viku og síðan aftur í gær en það lagðist að Bökugarði í bæði skiptin.
Stór grafa sem er á skipinu var notuð til að moka efninu á bílana en í fyrria skiptið var farminum ekið á uppfylllinguna sunnan syðri gangamunnans.
Steinsteypir sá um að taka á móti þessum förmum og á Fésbókarsíðu fyrirtækisins segir að þeir hafi fengið góða aðstoð frá öðrum verktökum á svæðinu. Seinni farmurinn var 6000 tonn og þegar mest var voru tólf bílar í notkun. Verkið tók um tólf tíma sem gera um 500 tonn á klukkustund, eða ríflega 8 tonn á mínútu.
Efninu var öllu komið fyrir á athafnasvæði Steinsteypis í Haukamýri þar sem Malbikunarstöðin Hlaðbær Colas hf. mun reisa malbikunarstöð á næstu dögum.
Í frétt Morgunblaðsins um komu skipsins í síðustu viku kom m.a fram að á Húsavíkursvæðinu væri lítið um steinefni sem hentar í efsta lag malbiks, slitlagið. Því hafi verið ákveðið að flytja inn frá Noregi efni sem henti sérstaklega vel í malbik. Það sé valið vegna styrkleika og litar. Áhugi sé á því að hafa ljósara steinefni í göngunum til að lýsa malbikið aðeins upp. Þá sé valið efni af mjög miklum styrkleika.
Norfjörd við Bökugarðinn og uppskipun á fullu.
6000 tonnum af norskri möl var ekið frá skipshlið við Bökugarðinn suður á athafnasvæði Steinsteypis sem sést efst á myndinni.