Völsungur 90 ára í dag - Afmælissýning í Safnahúsinu

Sýningargestir rýna í myndir.

Íþróttafélagið Völsungur er 90 ára í dag en það var stofnað 12. apríl 1927 á Húsavík.

Af því tilefni var opnuð afmælissýning í Safnahúsinu síðdegis í dag. Þema sýningarinnar er Völsungur og samfélagið þar sem skoðað er hvernig samfélagið mótar íþróttafélag og hvernig íþróttafélag mótar samfélag. 

Sýningarstjóri er Röðull Reyr Kárason en sýningin er að mestu byggð á skjölum úr Héraðsskjalasafni Þingeyinga og Ljósmyndasafni Þingeyinga. Þá eiga börn í Borgarhólsskóla og leikskólanum Grænuvöllum verk á sýningunni

Fjölmennni var við opnun sýningarinnar en þess má einnig geta að afmælisrit Völsungs var borið í hús í dag. Um er að ræða veglegt rit í ritstjórn Egils Páls Egilssonar þar sem litið er yfir farinn veg og viðtöl birt við áhrifamiklar persónur í sögu félagsins.

Hér koma nokkrar myndir úr Safnahúsinu og eins og fyrr: Með því að smella á þær er hægt að fletta þeim og skoða í stærri upplausn.

Röðull Reyr sýningarstjóri bauð gesti velkomna á afmælissýninguna.

Fjölmenni var við opnunina.

Meðal gesta voru Linda Margrét Baldursdóttir og Vilhjálmur Pálsson sem bæði hafa verið formenn Völsungs.

Sýningargestir á spjalli.

Eitt sinn Völsungur, ávallt Völsungur. Friðgeir Bergsteinsson klæddist grænu í tilefni dagsins.

Hjálmar Bogi Hafliðason og Björg Jónsdóttir.

Egill Olgeirsson á skrafi við Hermann Aðalsteinsson varaformann HSÞ.