Um þriðjungur landsmanna borðar skötu á Þorláksmessu

Það var létt yfir mönnum við pottana.

Rétt rúmur þriðjungur landsmanna heldur á vit skötunnar á Þorláksmessu en þetta leiðir ný könnun MMR á jólahefðum landsmanna í ljós.

GPG Seafood á Húsavík stóð fyrir árlegri skötuveislu í gær en hefð er fyrir því að fyrirtækið bjóði starfsfólki, viððskiptavinum og fleiri góðum gestum til veislu fyrir jólin.

Þar var í boði auk skötunnar, saltfiskur og fleira fiskmeti ásamt meðlæti af ýmsum toga sem menn gerðu góð skil.

Heimir og Sævar glaðbeittir við pottana.

Veisluborðið hlaðið kræsingum.

En aftur að könnuninni en hún var framkvæmd dagana 5. til 11. desember 2018. Alls voru 35,3% sem sögðust ætla að borða skötu á morgun, Þorláksmessudag, sem er nær óbreytt frá því í fyrra. Eitthvað er því farið að hægja á skötusamdrætti en hlutfall þeirra sem segjast ætla að borða skötu á Þorláksmessu hefur lækkað um 6,8 prósentustig frá því að tíðni skötuáts náði hámarki í mælingum MMR árið 2013.

Fækkar í hópi kvenna sem borða skötu.

Skatan er líkt og áður vinsælli hjá körlum heldur en konum en 44% karla sögðust ætla að gæða sér á skötu á Þorláksmessu þetta árið, samanborið við 26% kvenna. Hlutfall þeirra kvenna sem sögðust ætla að borða skötu um hátíðarnar hefur lækkað á undanförnum árum en 28% kvenna kváðust ætla að borða skötu í mælingum ársins 2017 og 32% árið 2016.

Skatan heldur einnig áfram að höfða meira til eldri matgæðinga heldur en þeirra yngri en 51% svarenda 68 ára og eldri sögðust ætla að fara í skötu í ár, samanborið við einungis 20% þeirra 18-29 ára. Þá naut skatan einnig meiri vinsælda á landsbyggðinni þar sem að 42% svarenda kváðust ætla að borða þorláksmessumáltíðina, samanborið við 31% íbúa höfuðborgarsvæðisins.

Stuðningsfólk Miðflokks (54%), Framsóknarflokks (50%) og Sjálfstæðisflokks (44%) reyndist líklegast allra stuðningsmanna stjórnmálaflokkanna til að segjast hyggja á að skella sér í skötu á Þorláksmessu. Skatan nýtur hins vegar minnstra vinsælda á meðal stuðningsfólks Pírata en einungis 22% þeirra hyggja á skötuát þetta árið.