Tóku fyrstu skóflustungu að húsnæði fyrir félagsmiðstöð og frístund

Julia Maria Dlugosz og Sveinn Jörundur Björnsson.

Í dag var fyrsta skóflustungan tekin að húsnæði sem hýsa mun félagsmiðstöð og frístund á Húsavík.

Eins og áður hefur komið fram á 640.is var Trésmiðjan Rein með lægsta tilboð í verkið sem var 97% af kostnaðaráætlun. 

Það voru þau Julia Maria Dlugosz nemandi í fyrsta bekk Borgarhólsskóla og Sveinn Jörundur Björnsson nemandi í tíunda bekk skólans sem tóku fyrstu skólfustunguna að viðstöddum nemendum og starfsfólki skólans ásamt gestum.

Eins og áður segir verður í byggingunni ný aðstaða félagsmiðstöðvar og frístundar með tengigangi að jarðhæð Borgarhólsskóla og því innangengt milli nýja húsnæðisins og skólans.

Verklok eru áætluð í upphafi júní 2026. Flatarmál húsnæðisins er 875 m2.

"Ég held að nýtt frístundahús muni hafa veruleg áhrif hér á samfélagið. Frístundin og félagsmiðstöðin fyrir unglingana hafa verið á flakki síðustu ár og fá nú varanlegt heimili og þar er nálægðin við skóla og íþróttahús er mikilvæg. Húsið er hannað þannig að hægt sé að bjóða upp á margskonar starfsemi fyrir ýmsa hópa og verður sennilega alltaf í fullri notkun.

Yndislegt fyrir Húsvíkinga að fá rými sem stuðlar að faglegra og fjölskylduvænna samfélagi.“ segir Andri Birgisson, deildarstjóri frístundar- og félagsmiðstöðvar á heimasíðu Norðurþings.

Julia Maria Dlugosz yngsti nemandi Borgarhólsskóla og Sveinn Jörundur Björnsson elsti nemandi skólans sem tóku fyrstu skóflustunguna í sameiningu.

Tryggvi Berg gröfustjóri leiðbeindi Juliu Mariu  og Sveini Jörundi.