Þjónustuskerðing hjá útibúum Lyfju á Raufarhöfn og Kópaskeri

Frá Raufarhöfn.

Þann 1. maí síðastliðinn breytti Lyfja afgreiðslufyrirkomulagi lyfja á Raufarhöfn og Kópaskeri þannig að ekki eru lengur haldnar birgðir lyfseðilsskyldra lyfja á þessum stöðum og því ekki hægt að fá þessi lyf afgreidd samdægurs. 

Umrædd lyf eru afgreidd og send frá Húsavík.  Þessi skerðing er ein af mörgum neikvæðum breytingum á ýmiskonar þjónustu á þessum stöðum sem íbúar hafa mátt þola á undanförnum árum og í þetta sinn er breytingin þeim mun gremjulegri þar sem hún kemur á sama tíma og opinberar stofnanir eru að vinna að byggðaátaksverkefni á Raufarhöfn um þessar mundir.  Íbúar eru að vonum mjög ósáttir og því hafa Íbúasamtök Raufarhafnar sent Lyfju eftirfarandi áskorun:

„Nýstofnuð Íbúasamtök Raufarhafnar harma þá ákvörðun Lyfju að skerða þjónustu við íbúa Raufarhafnar, Kópaskers og nágrennis.  Þessi breyting skerðir lífsgæði íbúa og eins og póstþjónustu er háttað, þá tekur einn til tvo daga að fá afgreidd lyf, þar sem lyfjasendingar koma gjarnan eftir lokun lyfjaafgreiðslu.  Einnig getur skapast hættuástand þar sem læknar geta ekki nálgast nauðsynleg lyf í bráðatilfellum.  Þetta telja íbúasamtökin vera aðför að öryggi íbúanna og skapi öryggisleysi, ekki síst hjá eldri borgurum.  Íbúasamtök Raufarhafnar skora á Lyfju að endurskoða þessa ákvörðun með hagsmuni íbúa svæðisins í huga.“

Afrit af áskorun sent til Heilbrigðisráðuneytis, Bæjarstjórnar Norðurþings, Heilbrigðisstofnunar Þingeyinga,  auk þeirra aðila sem að átaksverkefninu á Raufarhöfn standa, það er Byggðastofnun, Atvinnuþróunarfélag Þingeyinga og Háskólinn á Akureyri.

Íbúasamtök Raufarhafnar. (Fréttatilkynning)