Stöðva þurfti báða ofnana í kísilveri PCC

Kísilver PCC á Bakka. Mynd úr safni.

Stöðva þurfti báða ofnana í kísilveri PCC á dögunum vegna ófyrirsjáanlega vandræða í framleiðslu fyrirtækisins.

Þetta kemur fram á Facebooksíðu PCC Bakki Silicon en þar segir að þessi vandræði hafi byrjaði um miðja síðustu viku þegar stoðkerfi ljósbogaofnanna hafi hætt að virka almennilega.

"Það varð til þess að við þurftum að slökkva á Birtu (ofn 1). Samtímis varð framleiðslan í Boga (ofn 2) óstöðug vegna ójafnvægis í kerfinu og þurftum við því að slökkva á honum eins og kom fram í fyrra innleggi.

Þegar slökkt var á ofnunum þá lækkaði hitastigið í rykhreinsivirkinu og við það myndaðist raki sem leiddi til þess að kísilrykið varð klístrugt og stíflaði kerfið.

Mikil vinna hefur verið lögð í þrif á kerfinu til að losa allar stíflur áður en að ofnarnir verða settir á fullt afl aftur. 

Við höfum þurft að opna neyðarskorsteina í einhverjum tilvikum til að koma í veg fyrir reyksöfnun og til að loftgæði séu í lagi í verksmiðjunni þar sem starfsfólkið okkar sinnir sínum störfum. 

Við biðjumst velvirðingar á þeim reyk sem að fylgir því að opna neyðarskorsteinana. Við munum lágmarka opnun neyðarskorsteinana eins og mögulegt er meðan unnið er að því að koma framleiðslunni á fullt afl.

Núna er Birta komin á fullt afl og er að framleiða hágæða kísilmálm. Við gerum ráð fyrir að Bogi fari í gang seinni partinn á morgun" segir í tilkynningunni á Facebooksíðu PCC Bakki Silicon.