Sofia Birgitta Krantz ráðin teymisstjóri geðheilsuteymis HSN

Sofia Birgitta Krantz. Ljósmynd hsn.is

Sofia Birgitta Krantz hefur verið ráðin í nýtt starf teymisstjóra geðheilsuteymis fyrir Norðurland. 

Í tilkynningu segir að Sofia sé sálfræðingur að mennt og hafi undanfarin ár starfað hjá Sálfræðisetrinu. Áður en hún byrjaði hjá Sálfræðisetrinu starfaði hún sem sálfræðingur hjá Fangelsismálastofnun og í geðteymi Heilbrigðisstofnunar Suðurnesja.

Sofia kemur til starfa í júní og verður með starfsaðstöðu á Blönduósi.

Fram undan er vinna við að byggja upp meðferðar- og endurhæfingarúrræði vegna geðræns vanda í heimabyggð notanda. Starfssvæði HSN nær yfir norðanvert landið frá Blönduósi í vestri til Þórshafnar í austri. Unnið er að því að geðheilbrigðismeðferð verði í boði á öllu svæðinu, meðal annars með notkun fjarskiptabúnaðar í meðferð.

Fram undan er mikil uppbygging þjónustu við alla aldurshópa í samræmi við geðheilbrigðisáætlun 2016-2020 og fljótlega verða auglýstar aðrar stöður innan geðheilsuteymisins.