Snorri og Kristján meistarar – Fannar Breki efstur á mótinu

20. mar

Snorri og Kristján meistarar – Fannar Breki efstur á mótinu
Íþróttir - - Lestrar 316

Keppendur fengu páskaegg í mótslok.

Skákþing Hugins fyrir 16 ára og yngri fór fram á Húsavík í gær.

18 keppendur mættu til leiks og þar af fjórir gesta keppendur frá Akureyri.

Tefldar voru 7 umferðir eftir swiss-managerkerfinu og var umhugsunartíminn 10 mín á mann.

Keppnin var jöfn og spennandi en svo fór að lokum að Fannar Breki Kárason frá Akureyri varð efstur með 6 vinninga. Í öðru sæti varð Snorri Már Vagnsson með 5 vinninga og varð hann því skákmeistari Hugins (N) í U-16 ára flokki.

Tumi Snær Sigurðsson frá Akureyri, Eyþór Kári Ingólfsson og Jakub Statkiewicz fengu einnig 5 vinninga en röðuðust neðar á stigum.

Í flokki keppenda fæddra 2005 eða síðar vann hinn ungi og efnilegi Kristján Ingi Smárason sigur með 4 vinninga af 7 mögulegum, en hann er einungis í 2. bekk. Sváfnir Ragnarsson, sem einnig er í 2. bekk, varð í öðru sæti með 3 vinninga og Magnús Máni Sigurgeirsson varð þriðji einnig með 3 vinninga.

Keppendur fengu páskaegg númer 4 fyrir þátttökuna, en þrír efstu í báðum flokkum fengu verðlaunapeninga og sigurvegararnir farandbikara að auki. Mótsstjóri var Hermann Aðalsteinsson.