Skólanefnd FSH lýsir yfir þungum áhyggjum af stöðu skólans

Jóney Jónsdóttir skólameistari FSH kynnti rekstraryfirlit fyrstu 10 mánaða ársins 2016 á skólanefndarfundi á dögunum

Ljóst er að staðan er dökk enda rekstrarfé skólans uppurið og stefnir í að rekstrarhalli á árinu verið rúmlega 12 milljónir króna. 

Hér má lesa fundargerð skólanefndar FSH frá 22. nóvember sl. en nefndin sendi frá sér eftirfarandi ályktun um þessa grafalvarlegu stöðu skólans:

„Fjárhagsleg staða Framhaldsskólans á Húsavík er grafalvarleg. Vegna rekstrarhalla, sem að lang mestu leyti er tilkominn  vegna launahækkana, hefur skólanum ekki borist rekstrarfé með reglubundnum hætti allt þetta ár. Það hefur leitt af sér talsverða skuldasöfnun og vanskil og nú er svo komið að skólinn á í talsverðum vanda með að reka grunnþjónustu sína.

Stjórnendum skólans hefur með útsjónarsemi og velvilja birgja tekist að reka hann á takmörkuðum framlögum þar til nú, m.a. með lækkun starfshlutfalls stjórnenda og skerðingu námsframboðs. Nú hefur þolmörkum verið náð og því óhjákvæmilegt að grípa til aðgerða sem gera skólanum kleift að sinna lagalegum skyldum sínum og tryggja aðgengi íbúa svæðisins að framhaldsskólanámi.

Skólanefnd Framhaldsskólans á Húsavík lýsir yfir þungum áhyggjum af stöðunni og kallar eftir tafarlausum aðgerðum stjórnvalda til að tryggja rekstrargrundvöll skólans."