Samþykkt ályktun um aukið fjárframlag til refa- og minkaveiða

Refa- og minkaveiðar hafa verið nokkuð í umræðunni í Norðurþingi síðastliðið ár eftir að fyrirkomulagi veiðanna var breytt þannig að þorri veiðimanna sá sér ekki fært að stunda veiðar með sama hætti og árin þar á undan. 

Í tilkynningu kemur fra að á síðasta fundi skipulags- og framkvæmdaráðs Norðurþings samþykkti ráðið að haldinn yrði vinnufundur um fyrirkomulag veiðanna þar sem þeim veiðimönnum sem hafa verið síðustu 3 ár með samning við Norðurþing um minka- eða refaveiðar yrði boðin þátttaka og einnig þeim landeigendum sem samningar um refa- og minkaveiðar ná yfir.

Markmið fundarins væri að skapa vettvang fyrir landeigendur og veiðimenn til að koma sínum sjónarmiðum á framfæri og gera tillögur að útfærslu veiða á refum og minkum.

Fundurinn var haldinn í gær. Hann var afar vel sóttur og sköpuðust málefnalegar og góðar umræður meðal fundarmanna.

Eftirfarandi ályktun var samþykkt á fundinum:

„Fjölmennur fundur landeigenda, æðabænda, sauðfjárbænda, íbúa og annarra hagsmunaaðila í Norðurþingi haldinn í Lundi í Öxarfirði 12. desember 2023 skorar á Ríkisvaldið, Umhverfisstofnun og Norðurþing að auka verulega fjármagn til refa- og minkaveiða til að takast megi að útrýma mink og takmarka tjón af völdum refa. Kostnaðarþátttaka af hálfu Ríkisins hefur hríðfallið undanfarna áratugi og er í dag föst tala sem dugar engan vegin til að mæta nauðsynlegum kostnaði við veiðarnar og stefnir í óefni ef ekki er spornað við nú þegar.“

Frá fundinum í gærkveldi. Ljósmynd Norðurþing