Rifós hf og Fiskeldið Haukamýri hafa fengið Aqua-GAP vottun

Rifós hf. og Fiskeldið Haukamýri ehf. hafa verið vottuð af svissneska fyrirtækinu IMO (Institute for Marketecology) samkvæmt staðlinum Aqua-GAP.

Um er að ræða vottun á sjálfbærni framleiðslunnar. Svinna-verkfræði ehf. vann að verkefninu fyrir fiskeldisstöðvarnar ásamt  Náttúrustofu Norðausturlands.

Eftirspurn eftir fiskmeti er sífellt að vaxa, en vegna minnkandi framboðs á villtum fiski er ljóst að aukinni eftirspurn verður að mæta með fiskeldi. Þá eru gæðakröfur neytenda til matvara að aukast og þá ekki síst til umhverfis- og heilnæmisvottunar vörunnar.  Vegna hreinnar orku, vatns og umhverfis eiga íslensk eldisfyrirtæki mikil tækifæri til að auka framleiðslu sína og markaðssetja heilnæmar afurðir sem eru framleiddar á umhverfisvænan hátt.

Aqua-GAP staðallinn er í eigu BIO-Foundation Switzerland og sér IMO um eftirlit og útgáfu vottorða. Fyrirtækið hefur það hlutverk að stuðla að umhverfisvænni framleiðslu og er það ekki rekið í hagnaðarskyni.  Aqua-GAP er staðall sem vottar sjálfbærni vörunnar og eru eftirfarandi þættir einkum hafðir að leiðarljósi.

• Gagnsæi og rekjanleiki
• Gæði á öllum stigum framleiðslunnar
• Tryggja að öll ferli í fiskeldinu séu til fyrirmyndar og að stuðlað sé að jákvæðum áhrifum á vistkerfi umhverfis eldisstöðina           
• Sýna samfélagslega ábyrgð

Markmiðið með vottuninni er að tryggja að öll keðjan frá framleiðslu til neytenda sé í samræmi við alþjóðlegan viðurkenndan staðal.  Eftirfylgni er með því að öll stýring eldisins tryggi bæði gæði og heilnæmi vörunnar ásamt því að að eldið valdi ekki skaða á umhverfinu.  Einnig skal vera tryggður rekjanleiki vörunnar frá eldisstöð til neytanda, þar með talið fóður sem notað er til framleiðslunnar.

Þess má geta að eldisstöðvarnar notar fóður frá Laxá hf. sem er viðurkennt sem sjálfbært hér heima.