PWC styður áfram við bakið á Völsungi

PwC og Völsungur hafa skrifað undir áframhaldandi samstarfssamning sín á milli.

PWC hefur verið öflugur samstarfsaðili félagsins undanfarin ár og séð um uppsetningu ársreikninga, könnun á ársreikningi Knattspyrnudeildar Völsungs vegna leyfiskerfis KSÍ, skilum á ýmsum fjárhagsgögnum og veitt faglega ráðgjöf er viðkemur rekstri íþróttafélags og þannig aðstoðað félagið að standast þær kröfur sem settar eru á íþróttafélög í dag. Samstarfið hefur því skipt miklu máli fyrir Völsung og mun gera það áfram.

„Það er okkur hjá PwC bæði ljúft og skylt að standa við bakið á Völsungi enda starf íþróttafélagsins, og íþróttafélaga almennt, gríðarlega mikilvægt í hverju samfélagi. Á persónulegu nótunum, þá er ég alinn upp í fjölbreyttu starfi íþróttafélags á landsbyggðinni svo það stendur mér nærri að geta stutt við starfsemi íþróttafélaga á því starfssvæði PwC sem ég veit forstöðu“ sagði Rúnar Bjarnason forstöðumaður PwC á Norðurlandi við undirritun samningsins.

Á myndinni má sjá Rúnar Bjarnason, forstöðumann PwC á Norðurlandi, og Jónas Halldór Friðriksson, framkvæmdastjóra Völsungs, handsala samninginn í sumarblíðu í nýju stúkunni á Völsungsvelli.