Öxarfjörður í sókn - Fimm verkefni fengu styrk

Brúin yfir Jökulsá á Fjöllum í Öxarfirði.

Verkefnið "Öxarfjörður í sókn", samstarfsverkefni Byggðastofnunar, Eyþings, Atvinnuþróunarfélags Þingeyinga og Norðurþings úthlutaði fimm styrkjum að heildarverðmæti sjö milljónir til verkefna á svæði þess í síðustu viku.

Verkefnin eru þessi:

Fuglamerki og aflestur- Guðmundur Örn Benediktsson. Markmiðið er að leita að merktum fuglum, lesa af merkjunum og taka myndir. Upplýsingunum verður komið til merkjenda og vísindastofnana heima og erlendis. Svæðið er strandsvæði Núpasveitar og Melrakkasléttu. Umsækjandi hefur fylgst með fuglalífi um árabil og skráð upplýsingar um það og skilað til Náttúrustofnunar á Húsavík og starfað með Ævari Petersen fuglafræðingi. Þetta verkefni ásamt Fuglastígsverkefninu eru bráðnauðsynleg svæðinu og þeirri sérstöðu sem það hefur meðal fuglaáhugafólks. http://www.birdingtrail.is/

Kjötvinnsla á Gilsbakka- Hafsteinn Hjálmarsson. Kjötvinnsla á Gilsbakka. Unnið er að tilraunum og vöruþróun og markaðssetning er í undirbúningi. Varan sem unnin er verður marinerað ærfille og lundir (tilbúið á grillið) og kindapylsur með hátt kjötinnihald sem umsækjendur segja vera nýjung. Umsækjendur eru sauðfjárbændur á Gilsbakka.

Leit og hönnun lausnar við að kæla vatn úr Æ3- Hitaveita Öxarfjarðarhéraðs hf. Leita á lausna, þróa og hanna lausn á kælingu á heitu vatni úr borholu Seljalax, Æ3, sem notuð er til að fæða hitaveitu Öxarfjarðarhéraðs. Með þessu sparast hluti þeirrar orku sem nú sóast í kælingu. Leitað verður samráðs til vísindasamfélags og ráðgjafarfyrirtækja í orkugeira. Samlegð gæti orðið milli þessa verkefnis og Eims sem er verkefni sem lýtur að því að virkja afgangsorku. http://www.eimur.is/

Örnefni í Öxarfirði- Urðarbrunnur, Halldór Valdimarsson. Staðsetja á örnefni í gagnagrunn Landmælinga Íslands og með því að bjarga menningarverðmætum og skapa tækifæri í menningartengdri ferðaþjónustu á jörðum í Öxarfirði. Samstarf er við Landmælingar Íslands og Árnastofnun. Umsækjandi, Urðarbrunnur, hefur sérhæfða þekkingu við slíka skráningu og mun einnig þjálfa skráningarmann af svæðinu. Á þessari vefslóð má sjá talsvert af vinnu Urðarbrunns í suður Þingeyjarsýslu og í kringum Mývatn, http://atlas.lmi.is/ornefnasja/

Þróun á mýkri ull- verkefnastjórn , sex manns aðallega af svæðinu. Prófa á ull af svæðinu í lítilli vélprjónaverksmiðju í Belgíu. Keypt verður ull af bændum úr Öxarfjarðarhéraði og fulltrúar verkefnisins fara til Belgíu.