Öruggur sigur Völsungs í blakinu

Völsungur sótti KA heim í Mizunodeild kvenna í gærkveldi og unnu öruggan sigur, 3-0.

Blakfréttir.is segja svo frá leiknum:

Gestirnir hófu leikinn af miklum krafti og gerðu móttöku KA lífið leitt með sterkum uppgjöfum. Þær komust fljótt í góða forystu og leiddu til dæmis 1-5. KA minnkuðu muninn í 5-7 áður en Völsungur gerði út um hrinuna með því að skora 11 stig í röð. Hrinunni lauk með 9-25 sigri Völsungs.

KA byrjuðu aðra hrinuna töluvert betur en þá fyrstu og leiddu 5-4. Völsungur skoraði þá 5 stig í röð og jók forskotið eftir því sem á hrinuna leið og 15-25 sigur staðreynd.

Í upphafi þriðju hrinu virtist sem KA væru staðráðnar í að snúa leiknum sér í hag þar sem sóknarleikur Völsungs átti fá svör við sterkri hávörn KA. Völsungur var hins vegar ekki á sama máli þar sem þær skoruðu 7 stig í röð, þar af 3 beint úr uppgjöf frá Ágústu Tryggvadóttur. Völsungur vann þriðju hrinuna 17-25 og leikinn þar með 0-3.

Stigahæst í liði KA var hin brasilíska Amanda Caroline Martins með 10 stig, en þetta var hennar fyrsti leikur fyrir félagið. Hjá Völsungi voru Camilla Johansson og Arna Védís Bjarnadóttir stigahæstar með 13 stig hvor. (blakfrettir.is)

Hér má sjá stöðuna í Mizunodeild kvenna