Öldungaráð kom saman í fyrsta skipti í Norðurþingi

15. feb

Öldungaráð kom saman í fyrsta skipti í Norðurþingi
Almennt - - Lestrar 432

Öldungaráð Norðurþings.

Miðvikudaginn 13. febrúar kom öldungaráð Norðurþings saman í fyrsta skipti í kjölfar nýrra laga sem tóku gildi 1. október 2018.

Á heimasíðu Norðurþings segir að áhersla á hvers kyns samráð og samvinnu við notendur hefur rutt sér til rúms innan velferðar-þjónustunnar.

Talið er mikilvægt að notendur eigi slíkan vettvang þar sem valdefling er höfð að leiðarljósi; fólk verði þannig virkir þátttakendur í mótun á þeim úrræðum og þjónustu sem því stendur til boða.

Samráð af því tagi sem hér um ræðir er þríþætt:

a. samráð við einstaka notendur í málum sem varða þá sjálfa,

b. samráð um stefnumótun og

c. samráð við hópa notenda um framþróun þjónustunnar.

Í hverju sveitarfélagi, eða í sveitarfélögum sem eiga samstarf um öldrunarmál og þjónustu við aldraða, skal starfa formlegur samráðsvettvangur er nefnist öldungaráð þar sem fjallað er um þjónustu við aldraða, framkvæmd og þróun öldrunarmála. Í samráðshópnum skulu að lágmarki sitja þrír fulltrúar kosnir af sveitarstjórn að loknum sveitarstjórnarkosningum og þrír fulltrúar tilnefndir af félagi eldri borgara, auk eins fulltrúa frá heilsugæslunni. Eigi tvö eða fleiri sveitarfélög samstarf um öldrunarþjónustu skulu viðkomandi sveitarfélög og félög borgara á þjónustusvæðinu koma sér saman um samsetningu öldrunarráðs.

Öldungaráð skal hafa eftirtalin verkefni á starfssvæði sínu:

1. Að fylgjast með heilsufari og félagslegri velferð aldraðra og samhæfa þjónustu.

2. Að gera tillögur til sveitarstjórna um öldrunarþjónustu.

3. Að leitast við að tryggja að aldraðir fái þá þjónustu sem þeir þarfnast og kynna öldruðum þá kosti sem í boði eru.

Öldungaráðið skal í störfum sínum hafa að leiðarljósi markmið laganna.

Til þess að mál fái formlega meðferð innan stjórnsýslunnar þarf öldungaráð að koma á framfæri formlegri tillögu til fjölskylduráðs.

Í öldungaráði Norðurþings eru Jón Grímsson formaður, Lilja Skarphéðinsdóttir varaformaður, Tryggvi Jóhannsson ritari, Helgi Ólafsson aðalmaður, Jónas Friðrik Guðason varamaður, Erla Óskarsdóttir varamaður, Kristbjörg Sigurðardóttir varamaður, Rannveig Benediktsdóttir aðalmaður, Ragnhildur Þorgeirsdóttir aðalmaður og Fanney Hreinsdóttir deildarstjóri hjá Norðurþingi.

Norðurþing hvetur íbúa til að vera í góðum samskiptum við öldungaráð og koma með ábendingar um það sem betur má fara í málefnum aldraðra innan sveitarfélagsins.