Nýr löndunarkrani á Raufarhöfn

Flytja á þennan löndunarkrana til Raufarhafnar.

Á fundi Skipulags- og fram-kvæmdaráðs Norðurþings í vikunni var samþykkt að flytja löndunarkrana sem staðsettur er við Húsavíkurhöfn til Raufarhafnar.

Í fundargerð segir að staðið hafi til um nokkurt skeið að staðsetja annan löndunarkrana á Raufarhöfn.

Talsverð löndunarbið hefur myndast yfir vertíðar sem orðið hefur til þess að aðkomubátar sem landað hafa á Raufarhöfn hafa leitað frekar á nærliggjandi hafnir til löndunar.

Að auki er núverandi krani komin til ára sinna og er orðin viðhaldsfrekari með árunum. Til stóð að kaupa nýjan krana en nú er komin upp sú hugmynd að færa nýjasta kranann á Húsavíkurhöfn til Raufarhafnar.

Umræddur krani hefur lítið verið nýttur af sjómönnum á Húsavík og bátum hefur frekar farið fækkandi þar. Kraninn er í mjög góðu standi enda lítið notaður.