Ný salernisaðstaða í Höfða Mývatnssveit

Nýja salernisaðstaðan í Höfða.

Salernisaðstaðan í Höfða var formlega opnuð þriðjudaginn 6. júní að viðstöddum sveitarstjóra, oddvita, starfsmönnum áhaldahúss, starfsmönnum sveitarfélagsins í Höfða og fulltrúa Umhverfisstofnunar.

Frá þessu segir á heimasíðu Þingeyjarsveitar en húsið var byggt af Trésmiðjunni Rein og salernin í því eru svokölluð sogsalerni, það þýðir að þau hafa álíka virkni og salerni í flugvélum.

Vegna sogvirkni salernanna þarf töluvert minna vatn en í venjulegu salerni og eru því vatnssparandi. Svartvatnið sem safnast frá salernunum er flutt í svartvatnstank, þar sem svartvatn er aðskilið frá grávatni og næringarefni þess nýtt til uppgræðslu á Hólasandi.