Ný brunavarnaáætlun undirrituð í Langanesbyggð

Þann 24. ágúst var undirrituð ný brunavarnaáætlun fyrir starfssvæði Slökkviliðs Langanesbyggðar, en hún hefur verið samþykkt af sveitarstjórnum Langanesbyggðar og Svalbarðshrepps.

Á heimasíðu Langanesbyggðar segir að við undirritunina hafi dr. Björn Karlsson forstjóri Mannvirkjastofnunar hrósað Slökkviliði Langanesbyggðar fyrir góðan búnað og gott starf.

Elías Pétursson sveitarstjóri sagði af sama tilefni mikilvægt vegna rekstur sveitarfélagsins að hafa áætlun um rekstur og endurnýjun búnaðar fram í tímann. 

Starfssvæðið nær yfir tvö sveitarfélög Langanesbyggð og Svalbarðshrepp og þá tvo þéttbýliskjarna sem á starfsvæðinu eru, Þórshöfn og Bakkafjörð. Íbúafjöldi á svæðinu er 650 manns og vegalengdir innan þess um 50 km frá Þórshöfn.

Slökkvilið Langanesbyggðar er með samtarfssamning við slökkvilið Norðurþings og Brunavarnir Austurlands. Einnig er samningur við Isavia um slökkvi- og björgunarstörf á Þórshafnarflugvelli og er samrekstur á dælubíl í þeim samningi.

Brunavarnaráætlun leggur grunnin að gæðastjórnun og úttekt á starfsemi slökkviliðs fyrir þá aðila sem bera ábyrgð á brunavörnum í hverju sveitarfélagi.

Áætlunin auðveldar íbúum sveitarfélagsins að fá upplýsingar um veitta þjónustu og skipulags slökkviliðs og er sett skv. nýjum lögum um brunavarnir.

Brunavarnaráætlun Slökkviliðs Langanesbyggðar 2018-2023 er birt á heimasíðu sveitarfélagsins hér.