Norðurþing samþykkir keðjuábyrgð - Skútustaðahreppur einnig

Á fundi sveitarstjórnar Norðurþings síðastliðinn þriðjudag var samþykkt að sveitarfélagið samþykkti keðjuábyrgð.

Fer sveitarfélagið að dæmi annarra sveitarfélaga sem hafa gert slíkt hið sama að undanförnu.

Í eftirfarandi bókun sem sveitarstjórn lagði fram segir:

"Sveitarstjórn Norðurþings samþykkir að innleiða keðjuábyrgð hjá sveitarfélaginu. Þetta gildir um alla samninga um verklegar framkvæmdir og kaup á þjónustu á vegum sveitarfélagsins. Þannig verði sett inn í slíka samninga ákvæði um keðjuábyrgð þeirra seljenda sem sveitarfélagið semur við. Með þessu vill Norðurþing tryggja að allir starfsmenn, hvort sem það eru starfsmenn verktaka, undirverktaka eða starfsmannaleiga, njóti launa, trygginga og annarra réttinda í samræmi við gildandi kjarasamninga og lög hverju sinni. Aðalverktakinn verði þannig í verksamningi gerður ábyrgur fyrir að tryggja kjarasamnings- og lögbundin réttindi allra starfsmanna sem að verkinu koma. Þetta verður gert til að koma í veg fyrir undirboð og óeðlilega samkeppnishætti á vinnumarkaði." (nordurthing.is)

Þá hefur Skútustaðahreppur einnig samþykkt keðjuábyrgð. Það var gert á fundi sveitarstjórnar í gær, 23. nóvember en fundargerðina má lesa með því að smella hér.