Ljótu hálfvitarnir gefa fyrsta lagið af væntanlegri plötu

11. sep

Ljótu hálfvitarnir gefa fyrsta lagið af væntanlegri plötu
Fréttatilkynning - - Lestrar 491

Ljótu Hálfvitarnir í Hrísey. Lj. af FB-síðu þeirra

Ljótu hálfvitarnir lögðu nýverið undir sig heila eyju í hálfan mánuð til þess að semja, æfa og taka upp nýja plötu.

Í slagtogi við Flex Árnason upptökumeistara tókst ætlunarverkið fullkomlega og lygilegt að sjá hversu miklu 10 manns geta áorkað á stuttum tíma séu þeir settir saman í einangrun en eyjan sem um ræðir ku vera Hrísey í Eyjafirði. Platan, sem er þeirra fimmta, er væntanleg á þessu ári enda aðeins eftirvinnslan sem upp á vantar eftir þessa mögnuðu dvöl.

Fyrsta lagið, Hosiló, lítur nú dagsins ljós og setur tóninn fyrir það sem koma skal. Í dag var lagið gert aðgengilegt á YouTube með skemmtilegu textamyndbandi þar sem einnig getur að líta svipmyndir frá Hríseyjardvölinni.

Þá var lagið einnig boðið til niðurhals án endurgjalds gegnum þennan hlekk: http://bit.ly/ljotu_hosilo

Nóg er framundan hjá Ljótu hálfvitunum. Auk plötuútgáfunnar og alls sem henni tilheyrir blása þeir til tónleika með Karlakórnum Hreimi þann 14. nóvember í Hofi á Akureyri. Þetta er gert vegna fjölda fyrirspurna en þetta samstarf hófst á vordögum þegar kórinn og Hálfvitar spiluðu fyrir fullum húsum bæði á Ýdölum, skammt frá heimahögunum á Norðurlandi, og í Háskólabíói.

Miðar á viðburðinn eru komnir í sölu hér: https://tix.is/…/1435/karlakorinn-hreimur-og-ljotu-halfvit…/

Ljótu hálfvitarnir eiga 10 ára afmæli á næsta ári og inniheldur sveitin ennþá alla sína 9 upprunalegu meðlimi. Geri aðrir betur.