Ljótu hálfvitarnir á Græna hattinum

Ljótu Hálfvitarnir.

Ljótu hálfvitarnir lögðust í dvala í september síðastliðnum og hafa ekki bært á sér síðan.

Föstudag og laugardag næstkomandi mun þó þessi níuhöfða símjúki loðbangsi heldur betur rumska á ný, því sveitin hyggst hertaka Græna hattinn á Akureyri og láta þar öllum illum látum. 

Rifjaðir verða upp gamlir taktar og jafnvel bæði tónar og textar við taktana. Þegar Hálfvitum er sleppt út á meðal fólks eftir svo langa pásu eru þeir gjarnan eins og kálfar að vori, svo hætt er við að kátínustuðullinn verði með mesta móti. 

Tónleikarnir hefjast kl. 22 bæði kvöldin. Enn eru til örfáir forsölumiðar í Eymundsson, Hafnarstræti á Akureyri, annars er bara að mæta.