Landsvirkjun fær jafnlaunavottun

Landsvirkjun hefur fengið vottun á jafnlaunakerfi fyrirtækisins og því til staðfestingar hefur fyrirtækið fengið afhent skírteini frá British Standard Institution og einnig jafnlaunamerki Velferðarráðuneytisins frá Jafnréttisstofu.

Í tilkynningu segir að jafnlaunakerfið stuðli að því að starfsmenn njóti jafnra launa fyrir jafnverðmæt störf. Starfsumhverfi og hlutverk Landsvirkjunar krefst fjölbreyttra starfa og er bakgrunnur starfsfólks mismunandi hvað varðar menntun, hæfni og reynslu. Jafnlaunakerfi fyrirtækisins endurspeglar þessa fjölbreytni og styður við fagleg vinnubrögð sem fyrirbyggja hvers konar mismunun hvað varðar kjör starfsfólks.

Unnið var að innleiðingu kerfisins á árinu 2018 í samvinnu við PwC og var kerfið tekið út af BSI í byrjun desember. Einnig hafði Landsvirkjun fengið gullmerki Jafnlaunaúttektar PwC fyrir árið 2018, en hafði áður fengið gullmerkið 2013, 2015 og 2017.

Unnur Helga Kristjánsdóttir, forstöðumaður stjórnunarkerfis og umbóta, Ragna Árnadóttir aðstoðarforstjóri, Elín Pálsdóttir, Þórhildur A. Jónsdóttir og Laura Nesaule, sérfræðingar á starfsmannasviði og Sturla Jóhann Hreinsson, starfsmannastjóri, með jafnlaunaskírteinið.

Ljósmynd: Landsvirkjun.is