Kristján Þór Magnússon sveitarstjóri Norðurþings

Nýr meirihluti sveitarstjórnar Norðurþings hyggst ráða Dr. Kristján Þór Magnússon sem sveitarstjóra Norðurþings.

Kristján mun taka við starfi sveitarstjóra Norðurþings síðsumars. Þangað til að hann tekur við, hefur nýr meirihluti sveitarstjórnar farið þess á leit við fráfarandi sveitarstjóra Berg Elías Ágústsson um að gegna embættinu.

Kristján Þór Magnússon er 35 ára, borinn og barnfæddur Húsvíkingur. Hann stundaði nám við Framhaldsskólann á Húsavík og lauk þaðan stúdentsprófi árið 1999. Eftir fjögurra ára nám í Bandaríkjunum lauk hann grunnnámi (BA) í líffræði við Bates College í Maine árið 2003. Hann lauk meistaraprófi (MPH) í faraldsfræði frá Boston University School of Public Health árið 2006 og doktorsprófi (PhD) í íþrótta- og heilsufræðum frá Háskóla Íslands árið 2011.

Kristján Þór starfaði sem aðjúnkt meðfram doktorsnámi við HÍ frá árinu 2009, en var ráðinn lektor við Menntavísindasvið Háskóla Íslands árið 2011 og hefur sinnt bæði kennslu og rannsóknum á sviði lýðheilsu og heilsueflingar síðan þá. Undanfarin þrjú ár hefur Kristján Þór að auki sinnt hlutastarfi sem sérfræðingur og verkefnastjóri hjá Embætti landlæknis. Kristján sinnti á yngri árum fjölbreyttum sumar- og hlutastörfum meðfram námi á Húsavík, m.a. fyrir Norðursiglingu og Heilbrigðisstofnun Þingeyinga.

Kristján Þór er giftur Guðrúnu Dís Emilsdóttur, stjórnmála- og fjölmiðlafræðingi. Hún er dagskrárgerðarkona á RÚV og stjórnar morgunþættinum Virkir morgnar á Rás 2, ásamt því að vinna að innlendri dagskrárgerð í sjónvarpi. Þau hafa búið á höfuðborgarsvæðinu undanfarin sjö ár og eiga tvö börn,  þau Aðalheiði Helgu (6 ára) og Magnús Hlíðar (1 árs).

„Það eru gríðarleg verðmæti í því fyrir samfélagið í Norðurþingi að fá til okkar öflugan mann eins og Dr. Kristján Þór, til að vinna að áframhaldandi uppbygginu í sveitarfélaginu, ásamt því að laða fram það allra besta í okkar frábæru íbúum“  segir Friðrik Sigurðsson verðandi forseti sveitarstjórnar Norðurþings.