Kristján og Gylfi með sigra austur á Héraði

Gylfi Sigurðsson og Kristján R. Arnarson.

Um nýliðna helgi var haldið veglegt riffilmót á skotsvæði Skotfélags Austurlands á  Héraði og þar átti Skotfélag Húsavíkur tvo keppendur en þátttaka var með besta móti að sögn mótshaldara.

Skotið var svokallað Hunter Class á 100 m. og 200 m. með sérsmíðuðum nákvæmnis-rifflum. Kristján R. Arnarson og Gylfi Sigurðsson mættu fyrir hönd Skotfélags Húsavíkur og stóðu sig afar vel. Kristján sigraði í flokki Bench rest riffla 100  m. og Gylfi var í öðru sæti.

Í flokki breyttra veiðiriffla 100 og  200 m. sigraði Gylfi í samanlögðu, og Kristján hlaut silfur.

Það er löngu  ljóst að skyttur í Skotfélagi Húsavíkur eru fyrir löngu búnir að sanna að þær standast fyllilega samanburð við þá  bestu í þessu sporti. Skemmst er að  minnast árangurs Sigurðar Haukssonar í leirdúfuskotfimi erlendis þar sem  hann stóð sig  með  miklum  ágætum.

Með tilkomu skotvallarins á skotsvæði félagsins má segja að skotmenning á, og við nágrenni Húsavíkur hafi breyst  mikið til  hins  betra. Það er t.d. liðin tíð að sjá sundurskotin  vegskilti, en á  skotvellinum geta  félagsmenn  fengið útrás fyrir skotþörf sína.

Núna á vordögum stendur félagið í stórframkvæmdum og sl. vetur var lokið við nýja 400 m. langa riffilbraut, og fljótlega verður  hafist handa við byggingu riffilhúss og með tilkomu þess á að vera hægt að halda  öll stærri mót í þessu  sporti, sem fer mjög  vaxandi um þessar mundir.