Jökull mun verða þjónustuskip við olíuiðnað Norðmanna

Jökull ÞH við komuna til Reykjavíkur. Lj. ÓFÓ

Fyrir fundi Byggðarráðs Norðurþings á dögunum lá erindi frá GPG Seafood ehf. hvar varðaði forkaupsrétt sveitarfélagsins að fiskiskipinu Jökli ÞH-259.

Byggðarráð samþykkti að nýta ekki forkaupsréttinn en að sögn Gunnlaugs Karls Hreinssonar eiganda GPG Seafood ehf. hefur skipið verið selt til Noregs.

Jökli var siglt til Reykjavíkur á dögunum þar sem hann fer í slipp en hann mun verða þjónustubátur við olíuiðnað Norðmanna.

Jökull ÞH 259 var smíðaður fyrir Leó Sigurðsson útgerðarmann á Akureyri í Sandefjörd í Noregi árið 1964 og hét upphaflega Súlan EA 300.

GPG Seafood ehf. keypti skipið sumarið 2010 en Hörður Björnsson ÞH 260 leysti hann af hólmi sumarið 2015 og hefur Jökull að mestu legið við bryggju á Húsavík síðan.