Jökull kominn á veiðar, landaði á Húsavík í dag

Gunnlaugur Karl og Árninna Ósk við hið nýja skip.

Á átttunda tímanum í morgun kom hið nýja línu- og neta-skip GPG Seafood, Jökull ÞH 299, til löndunar á Húsavík.

Jökull, sem er á netum og lagði þau að þessu sinni í Breiðafirði, var í sinni fyrstu veiðiferð þar sem verið var að prufa skipið og útbúnað þess.

Að sögn Gunnlaugs Karls Hreinssonar stjórn­ar­formanns GPG gekk veiðiferðin vel og ágætur afli. Aðeins þarf þó að fínspússa nokkur atriði áður en haldið verður aftur til veiða í kvöld.

Jökull var smíðaður í Noregi árið 1996 og er 962 GT að stærð. Lengd hans er 44 metrar og breiddin 10 metrar.

Hann hét áður Nanoq og var gert út af Arctic Prime Fis­heries til veiða við Græn­land.  GPG Seafood keypti skipið á síðasta ári og er heimahöfn þess Raufarhöfn.

Í viðtali við Gunnlaug Karl í Morgunblaðinu á dögunum kom m.a fram að á síðastliðnu ári hefur verið skipt um aðal­vél og ljósa­vél­ar í skip­inu og ým­is­legt annað sem véla­skipt­un­um fylg­ir. 

Þá var skipt um kælimiðil, farið úr freon yfir í glycol, og fyr­ir um tveim­ur árum var stál í skip­inu end­ur­nýjað. Síðustu mánuði hef­ur verið unnið að ýms­um end­ur­bót­um á skip­inu í Hafnar­f­irði. 

Í veiðiferðinni nú er öðrum þræði verið að fínstilla búnað. Frysti­vél­ar eru um borð í Jökli, en fyrst í stað að minnsta kosti verður hrá­efn­is aflað fyr­ir fisk­vinnslu í landi.

Áhöfn­in á Herði Björns­syni ÞH 260 fór yfir á Jök­ul, en Herði verður lagt við bryggju næstu mánuði. Ákvörðun um fram­haldið ligg­ur ekki fyr­ir að sögn Gunn­laugs. Hörður Björns­son ÞH var upp­haf­lega smíðaður í Nor­egi 1964. Segir í Morgunblaðinu en eins og margir vita hét hann upphaflega Þórður Jónasson.

Jökull ÞH 299 kemur til hafnar á Húsavík í morgun.

Karlinn í brúnni, Þórður Birgisson.

Gunnlaugur Karl Hreinsson stjórnarformaður GPG Seafood tók við endanum.

Sigurður Ólafsson viðhaldstjóri GPG Seafood tekur við framendanum

Árninna Ósk Stefánsdóttir og Gunnlaugur Karl Hreinsson við hið nýja og glæsilega skip GPG Seafood.

Hér er verið að kara Jökul eftir löndun.

Jökull utan á Þvergarðinum og Hörður Björnsson við Suðurgarðinn til móts við húsakynni GPG Seafood.

Með því að smella á myndirnar er hægt að fletta þeim og skoða í hærri upplausn.

By clicking on the images you can view them in higher resolution