Jafntefli í snjóslag á Húsavíkurvelli

Arnþór Hermannsson markaskorari Völsungs.

Það var sannkallaður snjóslagur á Húsavíkurvelli í kvöld þegar Völsungur hóf leik í 2. deild Íslandsmótsins í knattspyrnu.

Það voru nágrannar okkar úr Magna á Grenivík sem mættu til leiks en bæði  liðin komu upp úr 3. deild í haust.

Það snjóaði allan tímann meðan á leik stóð og nokkuð ljóst að gervigrasvöllurinn kom í góðar þarfir við þessar aðstæður sem þó voru vart boðlegar.

Völsungur komst yfir á 14. mínútu leiksins með marki Arnþórs Hermannssonar eftir undirbúning Bjarka Baldvinssonar og Jóhanns Þórhallssonar.

Þannig var staðan þar til á 76. mínútu þegar Lars Óli Jessen jafnaði fyrir Magna. Þá fengu Magnamenn aukaspyrnu rétt utan teigs og fékk Bergur Jónmundsson sitt annað gula spjald og þar með rautt fyrir brotið.

Steinþór Már varði aukaspyrnuna en eftir klafs í teignum kom Lars Óli knettinum í netið. Það voru einhverjar vöfflur á dómara leiksins hvort ætti að dæma mark eða ekki en niðurstaðan var mark og staðan því jöfn og ekki fleiri mörk skoruð í leiknum.

Hér er hægt að lesa leikskýrsluna af vef KSÍ.

Ekki voru nú aðstæður góðar til myndatöku en hér koma nokkrar myndir frá leiknum og með því að smella á þær er hægt að fletta þeim og skoða í stærri upplausn.

Arnþór Hermannsson skoraði mark Völsunga í kvöld.

Steinþór Már Auðunsson varði mark Völsunga og það vel.

Bjarki Baldvinsson fyrirliði Völsunga.

Elvar Baldvinsson reynir skot að marki Magna eftir hornspyrnu.

Það þurfti að skafa fyrir línunum á meðan leik stóð og hér er Sigurgeir Stefánsson á sköfunni.

Halldór Orri Hjaltason.

Sigvaldi Þór Einarsson stóð vaktina í vörninni þar til á 53 mín. leiksins að Aron Kristófer Lárusson leysti hann af.

Eyþór Rúnarsson og Jóhann Þórhallsson sækja að marki Magna en Hjörtur Geir Heimisson markvörður og fyrirliði Magna greip boltann í tæka tíð.

Olgeir Sigurgeirsson lék sinn fyrsta deildarleik með Völsungi og hér á hann í baráttu við Magnamann og uppskar gult spjald fyrir brot.

Aron Kristófer Lárusson sæki hér upp kantinn en hann er lánsmaður frá Þór á Akureyri.

Sæþór Olgeirsson geysist upp völlinn en hann kom inná fyrir Arnþór frænda sinn á 77.mínútu.

Leiktíminn að renna út og jafntefli niðurstaðan.