Íþróttamaður Húsavíkur

Eins og kom fram á 640.is í gær var Kristbjörn Óskarsson valinn íþróttamaður Húsavíkur fyrir árið 2014 um helgina.

Kristbjörn er vel að titlinum kominn en síðastliðið haust stóð hann uppi sem Íslandsmeistari í 1. deild í einstaklingskeppni á Seyðisfirði.

Í öðru sæti var golfarinn Axel Reynisson en jöfn í þriðja til fjórða sæti voru gönguskíðakappinn Fannar Ingi Sigmarsson og Thelma Dögg Tómasdóttir hestaíþróttamaður.

Auk bikara hlutu íþróttamennirnir myndarlega ferðastyrki frá Kiwanis-klúbbnum Skjálfanda sem að venju stóð að kjörinu á Íþróttamanni Húsavíkur.

Mæðgurnar Svanhildur Jónsdóttir og Thelma Dögg Tómasdóttir voru kjörnar hestaíþróttamenn ársins og nokkuð ljóst að hestamennskan er sannkallað fjölskyldusport.

Egill Olgeirsson fulltrúi Kiwanisklúbbsins lýsti kjörinu og eftirfarandi kom fram þegar hann ávarpaði íþróttafólkið og gesti í Íþróttahöllinni á sunnudaginn og lýsti kjöri íþróttamans Húsavíkur fyrir árið 2014:

 „Þetta er nú í 19. sinn sem við Kiwanismenn heiðrum afreksfólk í íþróttum og veitum þeim viðurkenningar með þessum hætti. Það er nefnd innan Skjálfanda sem vinnur að þessu í samræmi við reglugerð um “Íþróttamann Húsavíkur”. 

Regla og hefð er um hvernig stig eru gefin og er þar tekið mið af ástundun, framförum og árangri í keppni innan félags, á héraðsvettvangi, á landsmótum, val í landslið og þáttöku í keppni fyrir Íslands hönd á mótum erlendis.

Að venju hefur nefndin leitað upplýsinga sem víðast um árangur liðins árs hjá húsvísku íþróttafólki, og alltaf hefur niðurstað nefndarinnar verið samhljóða hvað varðar mat á áhersluþáttum og um endanlega niðurstöðu um valið. Í ár miðað við aðstæður held ég jafnvel að þáttur ástundunar og félagslegrar þátttöku hafi haft meira vægi en oft áður.

Að þessu sinni sendum við erindi til forsvarsmanna 15 íþróttagreina og óskuðum eftir tilnefningum í 30 flokka. Svör bárust frá öllum, en 2 deildir í Völsungi,  Siglingadeild  og Motorcrossdeild  ákváðu að tilnefna ekki að þessu sinni og rökstuddu það í svari sínu, og sumar deildir/félög tilnefndu aðeins í öðrum aldurs flokknum.

Í dag munum við heiðra 18 íþróttamenn fyrir afrek sín og ástundun í 13 íþróttagreinum, auk þess verður afhendur eins og áður  “Hvatningabikar ÍF”  og að lokum tilkynnt um val á sæmdarheitinu “Íþróttamaður Húsavíkur 2014”  úr hópi þessara íþróttamanna.

Þessi aðferð sem nú hefur verið vihöfð til fjölda ára hefur gefið okkur þó nokkra innsýn í starf íþrótta á svæðinu og þróun sem átt hefur sér stað á þessum árum. Sumar íþróttagreinar dafna og eflast, nýjar koma til,  meðan aðrar dragast saman eða jafnvel lognast út af.  Spurning er um ástæður,  er það ríkjandi tískusveiflur eða hefur aðstöðusköpun í sveitarfélaginu þar afgerandi áhrif ? 

Aðferðafræðin hefur verið rædd innan nefdarinnar og hefur stjórn Skjálfanda nú ákveðið að óska eftir viðræðum við forsvarsmenn íþróttafélaganna og sveitarfélagsins um endurskoðun á þessu fyrirkomulagi, ræða um framhaldið og hvort áhugi sé á breytingum ?  

Þetta hefur verið all sæmilegt íþróttaár, árið 2014 á Húsavík.

Á árinu unnust þó nokkrir sigrar, einum Íslandsmeistartittli var landað,  en eins og gengur hafa einhverjir orðið fyrir vonbrigðum og markmið ekki náðst. Aðstaða til íþróttaiðkana hefur eitthvað verið bætt, en meira þarf ef duga skal. 

Mikilvægt er að forgangsröðun og áætlun um uppbyggingu íþróttamannvirkja sjái dagsins ljós og  áfram verði unnið af metnaði  að uppbyggingu íþróttamannvirkja húsvísku mannlífi til heilla. 

Húsvísk íþróttaæska hefur á liðnu áratugum farið víða við góðan orðstír og borið uppeldis stað sínum Húsavík gott vitni um gott og öflugt mannlíf,  engu að síður er mikilvægt að geta haldið sem allra lengst í unga fólkið okkur hér heima og einn af mikilvægustu þáttum í þeirri viðleitni er að geta boðið ungu fólki upp á kraftmikið og fjölbreytt íþróttastarf".

Hér að neðan er umsögn um Kristbjörn Óskarsson Íþróttamann Húsavíkur 2014:

Kristbjörn er marg reyndur bocciamaður  sem  hefur til fjölda ára eða allt frá stofnun Boccia-deildarinnar verið í hópi okkar bestu Bocciamanna. Keppt á öllum Íslandsmótum og öðrum stórmótum, bæði í einstaklings og liðakeppni, en hann er í  1. deild bæði  í einstaklings og liða flokki.

Áður hefur Kristbjörn verið valinn í landslið Íslands í Boccia til að keppa fyrir Íslands hönd á Norðurlandamóti sem haldið var í Reykjavík  og var  árangur hans góður þó ekki næði hann að komast þar á verðlaunapall.

Árið 2014 var mjög gott bocciaár hjá honum, komst í úrslit á flest öllum stórmótum ársins og öðrum mótum sem hann tók þátt í, og toppaði svo árið á Íslandsmótinu í einstaklingskeppni á Seyðisfirði s.l. haust með því að standa uppi sem Íslandsmeistari 1. deildar einstaklingskeppni.  Glæsilegur árangur

Kristbjörn er íþróttamaður sem ætíð hefur lagt mikla rækt og dugnað í íþrótt sína, og með elju og samviskusemi náð þeim árangri til fjölda ára að halda sig í hópi meðal allar bestu bocciamanna Íslands.

Sannur íþróttamaður þarna á ferð og að venju glæsilegt boccia ár að baki hjá Kristbirni  og er hann því vel að titlinum kominn og fötluðu íþróttafólki mikil hvatning og félagi sínu Völsungi til mikils sóma.

Benedikt Kristjánsson forseti Kiwanisklúbbsins Skjálfanda afhenti sínum gamla nágranna af Höfðaveginum verðlaun þau sem fylgja titlinum Íþróttamaður Húsavíkur.

Þeir sem hlutu tilnefningar í kjöri Íþróttamanns Húsavíkur fyrir árið 2014 .

Handknattleikur 16 ára og yngri: Gunnar Már Vilhjálmsson.

Knattspyrna 16 ára og yngri: Sæþór Olgeirsson.

Knattspyrna 17 ára og eldri: Berglind Kristjánsdóttir.

Frjálsíþróttir 16 ára og yngri: Arna Dröfn Sigurðardóttir.

Frjálsíþróttir 17 ára og eldri: Dagbjört Ingvarsdóttir.

Skíði - alpagreinar 16 ára og yngri: Fannar Reykjalín Þorláksson.

Skíði - ganga 16  ára og yngri: Fannar Ingi Sigmarsson.

Sund 16 ára og yngri: Sif Heiðarsdóttir.

Fimleikar 16 ára og yngri: Arna Védís Bjarnadóttir.

Boccia 16 ára og yngri: Hildur Sigurgeirsdóttir.

Boccia 17 ára og eldri: Kristbjörn Óskarsson.

Hlaup 17 ára og eldri: Jón Friðrik Einarsson.

Golf 16 ára og yngri: Agnar Daði Kristjánsson.

Golf 17 ára og eldri: Axel Reynisson.

Hestaíþróttir 16 ára og yngri: Thelma Dögg Tómasdóttir.

Hestaíþróttir 17 ára og eldri: Svanhildur Jónsdóttir.

Skotíþróttir 17 ára og eldri: Kristján R. Arnarson

Blak 17 ára og yngri: Blaklið - 4.fl. stúlkna.

Hér má skoða myndir af þeim íþróttamönnum sem tilnefndir voru, og voru viðstaddir, í kjöri Íþróttamanns Húsavíkur.

                                           

Jóna Rún Skarphéðinsdóttir hlaut Hvatningabikar Í.F

Jóna Rún Skarphéðinsdóttir hlaut hvatningarbikar Í.F. fyrir árið 2014 en hann er veittur árlega þeim einstaklingi sem að mati stjórnar Bocciadeildar og þjálfara sýnir bestu ástundun og mestu framfarir. Bikarinn er farandbikar gefinn af Íþróttasambandi Fatlaðra og geymir handhafi bikarsins hann milli útnefninga.

Jóna Rún  hefur stundað íþrótt sína í mörg ár og verið lengi meðal öflugustu liðsmanna Bocciadeildarinnar og er nú í 1. deild.

Hún lætur sig aldrei vanta á mót eða annað  sem  boðið er upp á hjá félaginu s.s. Húsavíkurmótum,  Norðurlandsmótum, Hængsmótum á Akureyri , og Íslandsmótum. Hún hefur einnig verið viljug til allra annarra verka sem þurft hefur að vinna og  verið virkur félagi í starfi Bocciadeildarinnar.

Jóna Rún er góð fyrirmynd þeirra sem stunda boccia. sl. vetur var hún tilnefnt til úrtöku á Norðurlandamót í boccia og lét ekki á sig fá að sækja æfingar fyrir það til Akureyrar og Reykjavíkur. Jóna Rún tók að sér að vera aðstoðarþjálfari hjá yngri flokknum í vetur og gerir það með ágætum. Mætir vel á æfingar og dugleg að leiðbeina nýliðum okkar.

Árið 2014 var gott  Bocciaár  hjá Jónu,  og  er  hún vel að þessari viðurkenningu komin og er góður handhafi  “Hvatningabikars ÍF “