Íbúafundur á Raufarhöfn

Heimskautsgerðið í Norðurljósabaði. Lj. GJ

Íbúafundur var haldinn 12. janúar sl. á Raufarhöfn í samvinnu við Heimskautsgerðið og hverfisráð.

Á vef Atvinnuþróunarfélags Þingeyinga segir að Guðný Hrund Karlsdóttir hafi verið með góða kynningu á Gerðinu og fór hún vel yfir upphafið, söguna og tenginguna við Gylfaginningu og Snorra- Eddu. 

Gunnar Jóhannesson fór yfir næstu skref varðandi framkvæmdina og stöðu fjármögnunar.

Ljóst er að Heimskautsgerðið er í dag mikill segull ferðamanna og er gestagangur nánast daglega allan ársins hring. Ein af stærstu áskorunum Raufarhafnar næstu misseri er að fá þá ferðalanga sem í Heimskautsgerðið koma til að staldra við á Raufarhöfn örlítið lengur.

Farið var yfir meginmarkmið Raufarhafnar sem unnin voru uppúr íbúafundum Raufarhafnar og framtíðarinnar. Ýmislegt hefur áunnist en betur má ef duga skal.

Eru það verkefni framtíðarinnar að vinna áfram með meginmarkmiðin en um þau má lesa hér

Með því að smella á þessa glæsilegu mynd Gunnars Jóhannessonar hjá Travel North af Heimskautsgerðinu má skoða hana í hærri upplausn.