Hvalaleiðsögn sem valfag í Framhaldsskólanum á Húsavík

Fulltrúar allra hvalaskoðunar-fyrirtækja á Húsavík ásamt fulltrúum frá Þekkingarneti Þingeyinga og Framhalds-skólanum á Húsavík skrifuðu undir viljayfirlýsingu í morgun um þátttöku í samstarfi sem hefur að markmiði að koma á fót námsmöguleika fyrir starfsfólk í hvalaskoðun.

Húsavík er þekkt sem frábær áfangastaður í ferðaþjónustu og hingað streyma hundruð þúsunda ferðamanna ár hvert til þess að upplifa náttúru, menningu og umhverfi. Hvalaskoðun er helsta aðdráttarafl í ferðaþjónustu á Húsavík.

Markmiðið er að þróa stutt, hagnýtt námsúrræði í heimahéraði sem sniðið verði sem valfag/fög samhliða stúdentsbrautum framhaldsskólans og/eða sem sjálfstæð námsleið fyrir fullorðna.  Náminu er ætlað að taka á nokkrum af þeim grunnþáttum sem mikilvægir eru fyrir störf við hvalaskoðun á Skjálfandaflóa.

Þannig myndu nemendur sem klára námið geta verið tilbúnir til lögskráningar í áhöfn og einnig hafa öðlast þekkingu á grunnþáttum sem hvalaskoðunarfyrirtækin sameinast um að nauðsynlegir séu. Með þessum hætti má auka líkur á að heimafólk taki að sér störf við hvalaskoðun, ekki síst ungmenni í árstíðabundnum störfum.

Í fréttatilkynningu segir að stefnt sé að þátttöku Ferðamálastofu í verkefninu. Leitað verður eftir viðurkenningu bæði samstarfsfyrirtækjanna og Ferðamálastofu á verkefninu.

F.v. Guðbjartur Ellert Jónsson framkvæmdarstjóri Norðursiglingar, Heiðar Halldórsson markaðsstjóri Húsavík Adventures, Guðrún Þórhildur Emilsdóttir hjá Sölku Whale Watching, Óli Halldórsson forstöðumaður Þekkingarnets Þingeyinga, Sverrir Yngvi Karlsson hjá Gentle Giants, Jóney Jónsdóttir skólameistari Framhaldsskólans á Húsavík og Herdís Þ. Sigurðardóttir aðstoðarskólameistari.