Hringvegurinn opinn rafbílaeigendum - Hlaða komin í Mývatnssveit

Friðrik fær hér fyrstu hleðsluna á bifreið sína.

Hátíðarstemning var í kalsaveðri við Mývatn í gær þegar ON tók þar í notkun hlöðu með hraðhleðslu fyrir rafbíla.

Með þessu hefur ON varðað allan hringveginn hlöðum. Friðrik Jakobsson sem starfar við ferðaþjónustu í Mývatnssveit fékk sér fyrstu hleðsluna að viðstöddum Þorsteini Gunnarssyni sveitarstjóra og Bjarna Má Júlíussyni, framkvæmdastjóra ON.

„Ég vona svo sannarlega að þessi tímamót hvetji ekki bara okkur landsmenn til að skipta yfir á rafmagn í samgöngum, heldur ekki síður ferðafólk sem hingað kemur,“ segir Bjarni Már Júlíusson, framkvæmdastjóri ON í tilkynningu.

Stendur við Fosshótel

Hlaðan stendur við Fosshótel í Reykjahlíð og auk hraðhleðslunnar er þar líka hefðbundin hleðsla (AC). Á milli Mývatns og Egilsstaða eru 165 kílómetrar og þar á milli er hlaða ON á Skjöldólfsstöðum í Jökuldal. Hún er nú búin AC hleðslu sem verður uppfærð fyrir sumarið.

Vorið 2017 – fyrir innan við ári – opnaði ON leiðina milli Akureyrar og Reykjavíkur og hefur ekki látið deigan síga síðan. Hlöður ON eru nú 31 talsins og á næstu vikum og mánuðum bætast um 20 við, á höfuðborgarsvæðinu og í öllum öðrum landshlutum.

Í „appi“ ON, ON Hleðsla er hægt að sjá hvar allar hlöður ON eru, hvaða tenglum þær eru búnar og hvort þær eru til reiðu. Í nýlegri uppfærslu á appinu er líka hægt að sjá hlöður annarra en ON og viðskiptavinir ON geta fengið yfirlit yfir orkukaup sín í hlöðum fyrirtækisins.

Sjá nánar á heimasíðu Orku náttúrunnar

Á meðfylgjandi mynd frá on.is eru Áslaug Thelma Einarsdóttir, Bjarni Már Júlíusson og Friðrik Jakobsson.