Hönnun – Matur – Nýsköpun

Dagana 26. - 27. september  verður haldin skapandi ráðstefna með áherslu á hönnun, nýsköpun og mat á Húsavík.

Viðburðurinn heitir því skemmtilega nafni, HönnunarÞing en meginmarkmið HönnunarÞings er að leiða saman krafta hönnunar og nýsköpunar útfrá tilteknu þema og þemað í ár er matur.

,,Þetta verður skemmtilegt, fróðlegt, gagnlegt og bragðgott.“ segir Stefán Pétur Sólveigarson vöruhönnuður og verkefnastjóri Hraðsins á Húsavík, en hann er forsprakki HönnunarÞings.

Hann heldur áfram ,,Við erum afar spennt að sameina fjölbreytta sýn hönnuða, frumkvöðla og matreiðslufólks og bjóða gestum að kanna hvernig form, bragð og framtíðarsýn blandast saman í einstaka upplifun”.

Dagskráin spannar atriði frá matvælakerfum og sjálfbærni yfir vörumerkja- og skynrænnar upplifunar. Gestir fá tækifæri til að kanna hvernig hönnun mótar það sem við borðum – og hvernig við upplifum það. 

Það verða

• Fyrirlestrar og erindi frá leiðandi hönnuðum, matreiðslumönnum og frumkvöðlum
• Bragðsmiðjur þar sem sköpun og tilraunir fara saman
• Sýningar sem sýna trauma í matarhönnun og vöruþróun
• Tónleikar og gjörningar sem örva öll skilningarvit
• Bíó
• Samvinnuverkefni milli listafólks, nemenda og heimamanna

Gestir úr ýmsum áttum kynna og fræða gesti um osta, súkkulaði, grásleppu, snigla og öl og vöruhönnun ýmis konar sem tengist mat og hráefnum. Þá verður vöruhönnunardeild Listháskóla Íslands í árlegri viku-dvöld í Hraðinu-miðstöð nýsköpunar í tengslum við viðburðinn.

Menningar-, nýsköpunar- og háskólaráðherra Íslands, Logi Einarsson, mun heiðra samkomuna en hann hefur mikla innsýn í heim skapandi greina þar sem hluti af hans reynslu felst í arkitektúr, dansi og textaskrifum, ,,það verður líf og fjör á suðupottinum á Stéttinni þessa daga og dagana á undan“ segir Stefán Pétur.  

,,Hátíðin hefst kl. 10:00 á föstudegi og lýkur með tónleikum í Sjóböðunum kl. 23:00 á laugardegi...en svo er ekki annað hægt en að eiga nautnastund á sunnudegi, svo fyrstir koma og fyrstir fá pláss hjá Eirnýju í ostaskólanum! HönnunarÞing er meira en ráðstefna, þetta er svona lífskúnstners og sköpunarkveikja – hvort sem þú ert hönnuður, matgæðingur, frumkvöðull, kokkur, nemandi eða einfaldlega með forvitnina að vopni, þá er eitthvað þarna fyrir þig“ segir Stefán Pétur.

Nánari upplýsingar um dagskrána má finna á miðlum Hraðsins.

,,Verið velkomin í innblástur, nýsköpun og sköpunargleði með okkur! Og ekki gleyma að panta borð á veitingastöðum Húsavíkur sem ætla prófa nýja rétti og ný hráefni í tilefni þemans í ár – það er gott að kitla bragðlaukana reglulega“ segir Stefán Pétur að lokum.