Hlaupið til styrktar Ívari Hrafni á fimmtudagskvöld

Sumarsólstöðuhlaup Völsungs verður haldið í annað sinn  fimmtudagskvöldið 21. júní kl. 20. Ræst verður við norðurenda Botnsvatns.

Þetta er í annað skiptið sem hlaupið er haldið.  Í ár er boðið upp á þrjár vegalengdir 3,5 km skemmtiskokk, 8,5 km með tímatöku og 13,5 km með tímatöku. Skráning fer fram á hlaup.is  til miðvikudagsins 20. júní kl. 23:59 og kostar 2000 kr. í hlaupið. Hægt verður að skrá sig frá kl. 19 á hlaupadag uppi við Botnsvatn en þá hækkar þátttökugjaldið í 3000 kr. Frjáls framlög umfram þessa upphæð eru vel þegin.

Samstarf við Íslandsbanka

Að sögn Heiðars Hrafns Halldórssonar sem er einn af aðalskipuleggjendum hlaupsins á viðburðurinn sér þónokkra forsögu. "Forsagan að þessu verkefni má rekja til samtals milli Aðalstjórnar Völsungs við Íslandsbanka en bankinn hafði áhuga á að koma að almenningshlaupi á Húsavík. Það var eiginlega ekkert annað í boði en að stofna nýjan viðburð til að af þessu gæti orðið og hafði ég persónulega áhuga á sumarsólstöðunum. Fyrirmyndin er miðnæturhlaup Suzuki í Reykjavík sem er líklega þriðja vinsælasta göthlaup landsins á eftir Reykjavíkurmaraþoni og Gamlárshlaupi ÍR. Við vorum með smá generalprufu í fyrra og hlupum þá klassískan "sláturhúshring". Nú verður hlaupið ræst frá Botnsvatni og mun enda niður á íþróttavelli við höfuðstöðvar Völsungs".

Til styrktar Ívari Hrafni

Heiðar segir að fljótlega hafi komið upp sú hugmynd að hafa viðburðinn til styrktar góðu málefni. "Við í Aðalstjórn Völsungs sáum okkur leik á borði að hér væri kjörið tækifæri til að stuðla að samhug íbúa og safna fyrir góðu málefni á sama tíma og við hreyfum okkur saman að hásumri. Að þessu sinni mun ágoði hlaupsins renna til styrktar Ívari Hrafni Baldurssyni sem hefur barist við veikindi frá fæðingu. Við hvetjum alla, einstaklinga, stofnanir og fyrirtæki til að láta gott af sér leiða, mæta og taka þátt eða styðja við málstaðinn beint".

Við þetta má bæta að þeir sem ekki komast á fimmtudagskvöldið eða treysta sér ekki í hlaupið geta lagt söfnuninni lið með því að leggja inn á reikning 0567-14-401520 kt. 710269-6379.

Verðlaunaafhending verður í Vallarhúsinu kl. 21:30. Frítt verður í sund fyrir þátttakendur í Sundlaug Húsavíkur og opið til kl. 23.

Nánari upplýsingar um hlaupið má finna HÉR og þá má skrá sig til leiks HÉR.