Hjónin á Felli færðu Björgunarsveitinni Hafliða björgunarlaun

Ásberg tekur við gjöfinni frá hjónunum í Felli.

Fyrir viku síðan var umfangsmikil björgunaraðgerð í Gunnólfs-víkurfjalli en þá var Reimar Sigurjónsson bóndi á Felli í Bakkafirði í sjálfheldu við fossinn Míganda

Honum var bjargað af sérhæfðum klettabjörgunar-mönnum, ásamt fjölmennu björgunarliði sem kom að aðstæðum.

Á heimasíðu Langanesbyggðar segir að þau hjónin, Reimar og Dagrún Þórisdóttir kona hans hafi notað tækifærið um helgina til að afhenda Björgunarsveitinni Hafliða björgunarlaunog tók Karl Ásberg Steinsson formaður sveitarinnar við henni.  Þá komu þau einnig fram einlægum þökkum til allra sem komu að þessari giftusamlegu björgun.

Reimar var í fjallinu að eltast við kindina Snöru sem hann sá með kíki heiman frá sér enda býr hann á Felli í Finnafirði, nánast við rætur fjallsins. Það fór þó svo að hann elti ána upp á klettasyllu en komst síðan ekki niður aftur, en fjallið er þverhnípt og var hann í um 200 m hæð yfir sjó.

Um 80 manns komu að þessari björgunaraðgerð en aðstæður voru afar erfiðar og fór svo að marga klukkutíma tók að komast til hans í myrkri og rigningu. Það var ekki fyrr en  undir morgun sem hann var kominn aftur í faðm fjölskyldurnar sem að vonum var ekki rótt á meðan á þessu stóð en hann hafði þá verið nærri 15 tíma í fjallinu.

Þyrla landhelgisgæslunnar var kölluð til, ásamt björgunarsveitum úr nágrenninu. Þá var áhöfnin á Geir ÞH kölluð til en þeir lýstu með sterkum ljóskastara upp í bjargið, ásamt bátinum Finna frá Bakkafirði. Allt er gott sem endar vel og frábært að sjá hversu gott starf björgunarsveitirnar okkar eru að vinna./GBJ

Fleiri myndir er hægt að skoða á heimasíðu Langanesbyggðar en þær tók Gréta Bergrún Jóhannesdóttir.