Hálfvitarnir með spilakvöld á Græna hattinum

Glöggir aðdáendur hafa kannski áttað sig á að hljómsveitin hefur gefið út fjórar plötur og á hverri þeirra eru 13 lög.

Af þessu tilefni var ákveðið að gefa út spilastokk þar sem hver plata stendur fyrir einn lit og hvert spil fyrir eitt lag.

Þetta var góði parturinn. Núna kemur glórulausi hlutinn:

Á Spilakvöldum Ljótu hálfvitanna draga áhorfendur spil úr stokknum og hljómsveitin spilar lagið sem dregið verður. Óþarfi að taka fram að innan um leynist margur Svartipétur. Sem eykur bara á gleðina, ef marka má viðbrögð áhorfenda á Café Rosenberg um síðustu helgi þar sem hugmyndin var prufukeyrð.

Og nú er sem sagt komið að Græna hattinum. Þar verða Ljótu hálfvitarnir um Hvítasunnuhelgina og forsala er í gangi í Eymundsson á Akureyri og á midi.is. Nýlega var þriðju tónleikunum bætt við svo nú er möguleiki að komast á Spilakvöld 6., 7. og 8. júní næstkomandi.

Þau hefjast kl. 22 föstudag og laugardag en kl. 21 á sunnudag, húsið opnar klukkutíma fyrr og á efnisskránni eru … ja, það verður bara að koma í ljós.