Hafrún og Jóhann bestu leikmenn ársins hjá Völsungi

Meistaraflokkur kvenna komst í úrslitakeppni um laust sæti í Pepsi-deild kvenna þar sem liðið beið lægri hlut gegn sterku liði FH. Á knattspyrnuárinu lék liðið 22 leiki í KSÍ-móti. Af þessum 22 leikjum voru 16 sigurleikir, 2 jafntefli og 4 tapleikir. 

Meistaraflokkur karla endaði sumarið virkilega vel, 28 stig af 33 mögulegum í 11 síðustu leikjunum tryggði liðinu 2. sætið í 3. deild og þar með farseðilinn í 2. deild að ári. Á knattspyrnuárinu léku strákarnir 27 leiki í KSÍ-móti. Af þessum 27 leikjum voru 17 sigrar, 3. jafntefli og 7 tapleikir.

Liðin léku virkilega skemmtilegan fótbolta á stórum köflum í sumar þar sem blásið var til sóknar og var árangurinn svo sannarlega eftir því.

Lokahófið var haldið með hefðbundnum hætti. Góður matur var framreiddur ásamt því sem dagskráin var með hefðbundnu sniði. Hófið náði hámarki sínu þegar leikmenn voru verðlaunaðir fyrir sumarið.

Bestu leikmenn ársins að þessu sinni voru Jóhann Þórhallsson og Hafrún Olgeirsdóttir. Jóhann var markahæsti leikmaður 3. deildar karla, skoraði 18 mörk í 17 leikjum. Hafrún var markahæsti leikmaður 1. deildar kvenna, skoraði 19 mörk í riðlinum í einungis 12 leikjum.

Leikmenn árisns voru valdir af meistaraflokksráðum. Hjá meistaraflokk kvenna varð Harpa Ásgeirsdóttir fyrir valinu. Harpa hefur leikið 116 leiki fyrir Völsung og skorað í þeim 40 mörk. Hjá meistaraflokk karla var Bergur Jónmundsson valinn leikmaður ársins. Begur var lykilmaður á miðju meistaraflokks karla í sumar.

Efnilegustu leikmenn að þessu sinni voru kosin Dagbjört Ingvarsdóttir og Elvar Baldvinsson. Bæði sýndu þau lipra takta í sumar og verður gaman að fylgjast með þeim á komandi árum. (volsungur.is)

F.v: Bergur Jónmundsson, Elvar Baldvinsson, Jóhann Þórhallsson, Hafrún Olgeirsdóttir og Dagbjört Ingvarsdóttir. Á myndina vantar Hörpu Ásgeirsdóttur sem var erlendis.

Meðfylgjandi mynd var fengin af heimasíðu Völsungs og þar má skoða fleiri myndir frá lokahófinu.