Hafliði afhenti Gjafasjóði Hvamms góða gjöf

Hafliði og Friðrika með gjafabréfið góða.

Í dag afhenti Hafliði Jósteinsson Gjafasjóði Hvamms, dvalaheimili aldraðra á Húsavík, góða gjöf.

Um er að ræða 442 þúsund krónur sem söfnuðust á tónleikum sem haldnir voru í Miðhvammi honum til heiðurs þann 17. mars síðastliðinn.

Þar lék Hljómsveit Hafliða mörg af hans uppáhaldslögum sem Hafliði hefur sungið mörg hver sjálfur á sínum langa tónlistarferli.

Hafliða var frjálst að velja hvaða félag hlyti ágóðann af tónleikunum og valdi hann Gjafasjóð Hvamms. Samkvæmt gjafabréfinu á að nýta féð til að gleðja heimilsifólkið með kaupum á sjónvörpum.

Hafliði sagði við þetta tækifæri að þetta hefði ekki verið erfitt val því í Hvammi hafi hann átt bestu ár starfsævi sinnar. Þar hafi hann  kynnst góðu fólki, jafnt starfsfólki sem heimilisfólki og þar hafi verið indælt að vera.

Friðrika Baldvinsdóttir formaður Gjafasjóðs Hvamms tók við gjöfinni úr hendi Hafliða.

Pétur Helgi Pétursson einn forsprakka tónleikanna, Friðrika Baldvinsdóttir formaður Gjafasjóðs Hvamms og Hafliði ásamt meðlimum í hljómsveit Hafliða sem lék á tónleikunum. Fv. Sigurður Illugason, Kristján Halldórsson, Gunnar Illugi Sigurðsson, Sigurjón Sigurðsson og Frímann Sveinsson. Unnsteinn Júlíusson og Guðni Bragason voru fjarstaddir.