Guðrún Tryggvadóttir nýr formaður Bændasamtakanna

Núverandi stjórn B.Í Mynd: Bbl.is

Guðrún Tryggvadóttir sauðfjárbóndi í Svartárkoti í Bárðardal í S-Þingeyjarsýslu mun taka við embætti formanns Bændasamtaka Íslands 1. mars nk. 

Frá þessu er greint á vef Bændasamtaka Íslands.

Sindri Sigurgeirsson, sem verið hefur formaður Bændasamtaka Íslands frá 2013, hefur óskað eftir því að stíga til hliðar. Hann tekur við nýju starfi í apríl sem svæðisstjóri Arion-banka á Vesturlandi með aðsetur í Borgarnesi. Í ljósi þeirra breytinga lætur hann af öllum trúnaðarstörfum fyrir samtök bænda.

Guðrún Tryggvadóttir, sem er núverandi varaformaður samtakanna, er menntaður kennari en rekur sauðfjárbú í Svartárkoti með systur sinni og fjölskyldum þeirra. Þar er einnig rekið menningar- og fræðslusetur auk ferðaþjónustu í Kiðagili í sömu sveit.

Guðrún er fyrsta konan til að gegna formennsku í heildarsamtökum bænda á Íslandi, allt frá því að þau fyrstu voru stofnuð undir nafninu „Suðuramtsins húss- og bústjórnarfélag“ árið 1837. Bændasamtök Íslands voru stofnuð í núverandi mynd árið 1995.

Við þessar breytingar verður einnig breyting á stjórn Bændasamtakanna. Guðrún Lárusdóttir, bóndi í Keldudal í Hegranesi í Skagafirði, sem er fyrsti varamaður í stjórn tekur sæti í aðalstjórn frá 1. mars. Guðrún Lárusdóttir er einnig formaður Búnaðarsambands Skagfirðinga.