Gamla myndin - Sjóminjasafninu fært líkan af Kolbeinsey

Líkanið af Kolbeinsey komið í Sjóminjasafnið.

Gamla myndin að þessu sinni er rétt tæplega tíu ára gömul, tekin í Sjóminjasafninu þann 6. maí 2007.

Tilefnið var að Sjóminjasafninu var fært líkan af skuttogaranum Kolbeinsey ÞH 10 við athöfn í safninu.

Eftirfarandi frétt sendi fréttaritari Morgunblaðsins til blaðsins:

Sjóminjasafninu á Húsavík var fyrir skemmstu fært að gjöf líkan af skuttogaranum Kolbeinsey ÞH 10 sem smíðuð var fyrir Húsvíkinga í Slippstöðinni á Akureyri 1981. Það var Kristján Ásgeirsson, fyrrverandi framkvæmdastjóri togaraútgerðanna Höfða hf. og Íshafs hf., sem afhenti Guðna Halldórssyni, forstöðumanni Sjóminjasafnsins, líkanið við athöfn í safninu.

Viðstaddir athöfnina voru nokkrir fyrrverandi áhafnarmeðlimir af Kolbeinsey ásamt fyrrverandi starfsmönnum útgerðarinnar í landi. Þá var Margrét Ásgrímsdóttir, ekkja Benjamíns Antonssonar sem lengst af var skipstjóri á Kolbeinsey, einnig viðstödd. Kristján sagðist lengi hafa reynt að ná líkaninu frá Slippstöðinni, þar sem það hefur verið alla tíð, en lítt orðið ágengt. Það var ekki fyrr en Anton Benjamínsson, sonur Benjamíns skipstjóra, tók þar við stjórn að það tókst og var þá auðsótt mál.

Kolbeinsey var smíðuð í Slippstöðinni 1981 og var hún í útgerð á Húsavík allt til ársins 1997 er hún var seld Þorbirninum hf. og fékk nafnið Hrafnseyri ÍS 10.

Nokkri fyrrverandi áhafnarmeðlimir af Kolbeinsey voru viðstaddir ásamt fyrrverandi starfsmönnum útgerðarinnar í landi.

Með því að smella á myndina er hægt að skoða hana í stærri upplausn.