Fyrsta skóflustunga að Norðurljósarannsóknarstöð á Kárhóli í Reykjadal

01. jún

Fyrsta skóflustunga að Norðurljósarannsóknarstöð á Kárhóli í Reykjadal
Fréttatilkynning - - Lestrar 434

Kárhóll í Reykjadal.

Mánudaginn 2. júní nk. kl. 18:00 mun Hermann Örn Ingólfsson skrifstofustjóri alþjóða-og öryggismálaskrifstofu utanríkis-ráðuneytisins og Zhang Han, deildarstjóra evrópumálefna í kínverska utanríkisráðuneytinu, taka fyrstu skóflustungu að Norðurljósarannsóknarstöð á Kárhóli í Reykjadal.

Í fréttatilkynningu segir að bygging stöðvarinnar sé liður í samkomulag milli Rannsóknamiðstöðvar Íslands –RANNÍS- og Heimskautastofnunar Kína (Polar Research Institute of China – PRIC) frá sl. hausti um stofnun sameiginlegrar miðstöðvar til norðurljósarannsókna á Íslandi undir nafninu China-Iceland Joint Aurora Observatory (CIAO). Heimskautastofnun Kína er opinber rannsóknarstofnun, sem heyrir undir Hafmálstofnun Kína (State Oceanic Administration – SOA) og er staðsett í Shanghai, Kína. Starf PRIC er þungamiðja norðurslóða-rannsókna í Kína og starfrækir stofnunin rannsóknastöð á Svalbarða, þrjár rannsóknastöðvar á Suðurskautinu og rekur ísbrjótinn Xuelong, Snædrekann. Nýr ísbrjótur er í framleiðsluferli.

Sjálfseignarstofnunin Aurora Observatory (AO) með staðfestri skipulagsskrá var stofnuð á síðast ári til að annast uppbyggingu og rekstur allrar aðstöðu á Kárhóli. Stofnaðilar eru þróunarfélögin tvö í landshlutanum; Atvinnuþróunarfélag Þingeyinga hf. og Atvinnuþróunarfélag Eyjafjarðar bs. , Atvinnuefling Þingeyjarsveitar ehf. , sem er eignarhaldsfélag sveitarfélagsins, Kjarni ehf. , sem er eignarhaldsfélag í eigu Þingeyjarsveitar, Sparisjóðs Suður-Þingeyinga og nokkurra einstaklinga í héraði og Arctic Portal ehf., en fyrirtækið hefur virka aðkomu að margvíslegum rannsóknar- og upplýsingaverkefnum á sviði norðurslóðamála.

Unnið er að breytingu á aðalskipulagi Þingeyjarsveitar og gerð deiliskipulags er í vinnslu, en gert er ráð fyrir að framkvæmdir geti hafist síðar á þessu ári. Byggð verður rúmlega 700 m2 bygging sem hýsa mun rannsóknartæki og vinnuaðstöðu fyrir vísindamenn auk gestastofu fyrir ferðamenn með sýningarrými og litlum ráðstefnusal til kynningar á norðurljósunum og öðrum þeim háloftafyrirbærum sem rannsökuð verða.

Sett hefur verið upp vefsíða verkefnisins á slóðinni www.karholl.is þar sem nálgast má frekari upplýsingar um verkefnið.

« Til baka