Fyrst kvenna oddviti Langanesbyggðar

Ný sveitarstjórn Langanesbyggðar.

Ný sveitarstjórn tók til starfa í Langanesbyggð á dögunum en þar var Hilma Steinarsdóttir grunn-skólakennari og háskólanemi kosin oddviti sveitarstjórnar, fyrst kvenna til að gegna því embætti.

Varaoddviti er Þorsteinn Ægir Egilsson íþróttakennari og sjúkraflutningamaður. 

Meirihlutasamstarf N og L lista var þar með innsiglað en það eru Hilma Steinarsdóttir og Reynir Atli Jónsson fyrir N listann Nýtt afl, og Þorsteinn Ægir Egilsson og Hulda Kristín Baldursdóttir fyrir L – Framtíðarlistann. 

Í kosningunum fékk U-listinn, Uppbygging-Samstaða-Ábyrgð, þrjá menn en það eru Siggeir Stefánsson, Halldóra Jóhanna Friðbergsdóttir og Björn Guðmundur Björnsson. Mikil endurnýjun hefur því átt sér stað en Siggeir Stefánsson var eini sitjandi sveitarstjórnarmaðurinn sem starfar áfram í sveitarstjórn. 

Hulda Kristín er yngsti kjörni fulltrúinn á landinu og meðalaldur meirihlutans því rétt rúmlega 30 ár. Það er ánægjulegt að fá nýtt og öflugt fólk inn sem hefur áhuga á að vinna samfélaginu til góðs. 

Helstu áherslur nýja meirihlutans eru að auka velferð og jafnrétti íbúa, ábyrg fjármálastjórnun, uppbygging nýs leikskóla, gagnsæ stjórnsýsla, varanleg lausn á sorphirðumálum, atvinnumál og nýsköpun.

Ný sveitarstjórn Langanesbyggðar á sínum fyrsta fundi, frá vinstri: Hulda Kristín Baldursdóttir, Reynir Atli Jónsson, Þorsteinn Ægir Egilsson, Hilma Steinarsdóttir, Halldóra Jóhanna Friðbergsdóttir, Björn Guðmundur Björnsson og Siggeir Stefánsson.