Framkoma sem sjómenn geta ekki liðið mikið lengur

Frá aðalfundi sjómannadeildar Framsýnar.

Sjómannadeild Framsýnar stóð fyrir aðalfundi deildarinnar í kvöld og var góð mæting á fundinn.

Eðlilega voru kjaramál sjómanna mikið til umræðu enda sjómenn verið samningslausir frá 1. janúar 2011. Eftir miklar umræður um kjaramál var eftirfarandi ályktun samþykkt samhljóða:

„Aðalfundur Sjómannadeildar Framsýnar skorar á SFS/LÍÚ að ganga nú þegar frá nýjum kjarasamningi við samtök sjómanna. 

Að mati fundarins er ólíðandi með öllu að útgerðarfyrirtækin í landinu skuli ekki sjá sóma sinn í því að undirrita kjarasamning sem byggi á kröfugerð sjómannasamtakana. 

Það að sjómenn séu búnir að vera samningslausir frá 1. janúar 2011 lýsir best framkomu útgerðarmanna í garð sjómanna, framkomu sem sjómenn geta ekki liðið mikið lengur.“

Leiðtogi sjómanna á Húsavík, Jakob Gunnar Hjaltalín var endurkjörinn í kvöld sem formaður Sjómannadeildar Framsýnar en hann hefur verið það til fjölda ára. Með honum í stjórn eru: Kristján Þorvarðarson varaformaður, Björn Viðar ritari og meðstjórnendur Snorri Gunnlaugsson og Kristján Hjaltalín.

Góð mæting var á aðalfundi Sjómannadeildar Framsýnar.